Маҳфилҳои илмӣ – Донишкадаи иқтисод ва савдои Донишгоҳи давлатии тиҷорати Тоҷикистон дар ш. Хуҷанд

Mar 12

ДУРҒБОФИ ИҒВОАНГЕЗИ ИФРОТӢ

Мушоҳидаву таҳлилҳои вақтҳои охир собит менамоянд,ки имрӯзҳо созмонҳои террористиву экстремистӣ (ифротгароӣ) ҷиҳати амали намудани ҳадафи ғаразнокашон, дар фазои иттилоотӣ дар Интернет паҳншаванда, аз қабили Facebook, Instagram, VKontakte, Twitter, Tumbler, Telegram, Youtube фаъолияташонро ба роҳ мондаанд. Дар робита ба ин, мисол меорем, ки яке аз пайрави ашаддии наҳзат Муҳаммадиқбли Садриддин мебошад, дар канали YouTube- ISLOH TV , пойгоҳи таҳлилӣ ва динӣ – ISLOH net фаъолияти муғризонаашро ба роҳ монда, дар барномаҳои ифротӣ бо номи “Минбари муҳоҷир” баромадҳо намуда, кораш танҳо дуруғбофию иғво андохтан аст. Ин дурғбофи иғвоангези ифротӣ бо василаи пахшу нашр кардани маводи ғаразнок миёни ҷомеаи тоҷик нуфуз пайдо кардан мехоҳад ва худро мубаллиғи озодию истиқлол ва пуштибони мардум вонамуд мекунад. Баромадҳои М.Садриддин ва думравонаш, алалхусус афроде бо номи Абдулло, Зохир, гуё дар Сурия иқомат дорад ва як қатор бо номҳои сохта, аз қабили “7+70”, “Ватан 665”ва ғайра, ки санаҳои 01, 04, 08 ва 11 марти соли равон , дар барномаи “Минбари муҳоҷир” баромади ифротӣ намуқданд, таҳлил намуда, қайд менамоем.

Ин гурӯҳаки дурғбофи иғвоангези ифротӣ дар хориҷи кишвар қарордошта, танҳо дар бораи камбудии ин ё он соҳа ва давлат ҳарф мезанад, ки ягон асос надорад. Дар робита ба ин, суол ба миён меояд.Оё дар дунё ҳаст давлате, ки муаммову мушкилӣ надошта бошад? Ба ин суол бе ягон душвори посух медиҳем: Нест, албатта. Пешрафтатарин давлатҳо дар ҷомеаи худ муаммоҳои мухталиф доранд. Илова бар ин, бояд қайд кард, ки имсол кишвари соҳибистиқлоламон 35- солигиашро бо шукуҳу шаҳомати хоса истиқбол мегирад ва даҳ соли аввали он ба давраи нооромии сиёсӣ рост меояд. Вале, душвориҳоро кишвари соҳибистиқлоламон дар муҳлати куҳтотарин паси сар карда, имруз дар ҳамаи соҳаҳои хоҷагии халқ дастовардҳои назаррас ба чашм мерасад. Бояд таъкидан хотиррасон кард, ки ҳар фарди солимақлу соҳибaтафаккур дар давоми умри худ пайваста баҳри қонеъ гардонидани завқи бадеӣ ва эстетикии худ мекӯшад ва дар ин раванд сайругашти саҳарӣ ё бегоҳӣ барои саломатӣ ва ҳам рӯҳияи нав мақбултар аст. Ҳатто, нафарони пастфитрату муғриз низ аз чунин таълимотҳо бархурдоранд ва дар майнаи пучи бемағз ҳавас ба сайругашт доранд. Аммо, мазҳабфурӯши бешараф- М.Садриддин, хуллас ин гуруҳаки дурғбофи иғвоангези ифротӣ бошад, оғӯши табиати биҳиштосоро ба сарқути мизи хоҷагони дасисабози хориҷӣ иваз намудаанд ва майнаашон олудаи палидию ғашиҳои асту дар он саводи казоӣ барои беҳбудии ҷомеа вуҷуд надорад. Дар асл бигирем, ин қабил бадхоҳони ифротӣ имрўз бозичаи кишварҳои хориҷӣ гардида, барои ташкил намудани гурўҳҳои муташакили ҷиноятӣ, ифротгароӣ машғул ҳастанд ва бо ин роҳ мардуми осоишта ва сулҳхоҳи тоҷикро ба ташкил намудани эътирозҳо даъват намудан кӯшиш доранд. Бояд хотиррасон кард, ки ин тоифа дурғбофи иғвоангези ифротӣ, аз М.Садриддин сар карда, то шогирдону пайравонаш, бо ибораи дигар наҳзату навнаҳзатиҳо дар минбарњо ҳаққи муаррифии миллати тоҷикро садо баланд карданро надоранд. Ногуфта намонад, ки ин тоифа дурғбофи иғвоангези ифротӣ дар қатори ланаткардагони халқу миллат ҷой доранд.

Дар фарҷоми андешаи хеш такрор ба такрор боз гуфтанием,ки баромадҳои дурғбофи иғвоангези ифротӣ, умуман наҳзату навнаҳзатиҳо бори дигар собит менамояд, ки барои амалиёти ҳар гуна гурӯҳҳои ифротиву ихтилофангез набояд фазои мусоид фароҳам оварем. Аз ин рў, барои решакан кардани аќидањои ифротї муборизаи беамон бояд барем, ки ин яке аз масъулияти муҳимтарини шаҳрвандиву фарзандии мост!

Р. АНВАРӢ,
устоди ДИС ДДТТ дар ш.Хуҷанд

Nov 04

Конференсияи ҷумҳуриявии илмӣ-амалӣ дар мавзуи “Масъалаҳои мубрами рақамикунонӣ дар бонкдории муосир”

Санаи 4-уми ноябри соли 2025 дар Донишкадаи иқтисод ва савдои Донишгоҳи давлатии тиҷорати Тоҷикистон дар шаҳри Хуҷанд, мувофиқи нақша – чорабинии Раёсати илм ва инноватсия, факултети молия ва баҳисобгирии бухгалтерӣ бо ташаббуси кафедраи молия ва қарз конференсияи ҷумҳуриявии илмӣ-амалӣ дар мавзуи “Масъалаҳои мубрами рақамикунонӣ дар бонкдории муосир” баргузор гардид. Дар оғози конференсия бо сухани ифтитоҳӣ директори ДИС ДДТТ, н.и.и., дотсент Ҷалилзода А.А. баромад намуда, меҳмононро хайрамақдам намуд. Қайд гардид, ки дигаргуншавии рақамии низоми бонкии Ҷумҳурии Тоҷикистон дар солҳои охир як самти асосии рушд ва пешрафти хизматрасониҳои молиявӣ гаштааст. Ҷорӣ намудани технологияҳои рақамӣ дар ташкилотҳои қарзӣ малакаҳои нав ва омода намудани кадрҳои баландихтисосро талаб менамояд. Ташкилотҳои қарзӣ фаъолияти худро тавассути ҷорӣ намудани технологияҳои рақамӣ такмил медиҳанд, то ин ки муваффақ ва рақобатпазир бошанд. Воқеан, дар амалияи имрӯзаи фаъолияти бонкҳои тиҷоратӣ, раванди баландсуръати рақамикунонии хизматрасониҳои бонкӣ яке аз афзалиятҳои рақобатӣ мебошад.

Дар ҷаласаи ифтитоҳии конференсия оид ба масъалаҳои “Рақамикунонии хизматрасониҳои низоми бонкӣ: таҳлили вазъи рақамикунонӣ дар минтақаи Суғд” сарбозраси шуъбаи назорати бонкии Шуъбаи минтақавии Бонки миллии Тоҷикистон дар ш. Хуҷанд Наҷмидинов Ф.М., “Рушд ва муаммоҳои рақамикунонӣ дар ташкилотҳои молиявию –қарзӣ дар Ҷумҳурии Тоҷикистон” сардори шуъбаи ҳуқуқи ҶСК “Бонки Эсхата” Ғафуров К.А., “Синергияи технологияҳо ва табодули инфрасохтори рақамӣ” директори компанияи “Техком” Рахматов И.А. ва “Механизмҳои қарздиҳии дарозмуддат дар таҷрибаи байналмилалӣ: таҳлили амалиёти “Твист” ва табдилдиҳии воситаҳои қарзӣ” н.и.и, дотсенти кафедраи кори бонкии МДТ “ДДХ ба номи академик Б. Ғафуров” Азизбоев Р.А. баромад намуданд.

Дар фарҷоми ҷаласаи ифтитоҳии конференсия хулоса карда шуд, ки дар шароити ҷаҳонишавӣ рақамикунонии фаъолияти ташкилотҳои қарзӣ барои бунёди низоми рақобатпазири хизматрасонӣ шароити заруриро таъмин намуда, арзиши адои хизматрасониҳоро коҳиш дода, суръати иҷрои амалиётҳоро баланд ва фоидаи бонкро ба сатҳи баланд мерасонад. Аз лиҳози гуфтаҳои боло мутахассисон бояд дарк кунанд, ки дар ҳолати рақамикунонии босуръат низоми бонкӣ чӣ гуна таҳаввул кардааст ва дар дурнамо чӣ гуна таҳаввул хоҳад кард. Сониян, тамоюли таҳияи технологияҳои комилан бехатар ва коркарди пойгоҳи интернетии барои мубориза бо киберҷинояткорон ва фаъолияти онҳо мубрамияти калон касб намудааст. Олимон ва коршиносони соҳа итминони комил доранд, ки ояндаи рушди иқтисоди миллӣ ва ҷаҳонӣ аз низоми бонкдории рақамӣ вобаста мебошад.

Mar 05

НАҚШ ВА МАҚОМИ ЗАНОН ДАР ҶОМЕАИ ТОҶИКИСТОН

Занону модарони мо ҳанӯз дар оғози даврони Истиқлоли давлатӣ ба хотири ҳифзи ҳуқуқу озодиҳои худ ва ба эътидол овардани вазъи кишвар азму талош карда, дар роҳи расидан ба сулҳу субот ва Ваҳдати миллӣ саҳми арзишманд гузоштанд.

Эмомалӣ Раҳмон

Дар таъриху фарҳанги халқи тоҷик иззату эҳтироми зан – модар ҳамеша ҷойгоҳи махсусро дорад. Зеро, зан- модар аввалин мураббии инсон аст ва тарбияи ҳар як шахс аз домони поки ӯ оғоз мешавад. Зан ҳамчун модар тамоми хислатҳои неки инсониро ба кӯдак ба таври табиӣ интиқол медиҳад ва ҳар рафтору ахлоқи модар ба ақлу хислати фарзанд таъсири бевосита мегузорад. Аз ин ҷост, ки агар зан – модар бомаърифату босавод гардад, давлату миллат ҳам ботаълиму ботарбия мегардад. Бинобар ин, ба ҷо овардани иззату эҳтиром нисбати модарону занон ва бонувону духтарон, вазифаи мардону писарон ба шумор меравад.
Ба шарофати Истиқлоли давлатӣ ва бо дастгириҳои бевоситаи Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон мақоми занону бонувон дар ҷомеа баланд гашта, фаъолияти онҳо дар вазифаҳои роҳбарии шохаҳои гуногуни ҳокимияти давлатӣ, дигар соҳаҳои иҷтимоӣ ва иқтисодӣ, корхонаҳои давлатӣ ва бахши хусусӣ бамаротиб афзоиш ёфт.
Тибқи маълумоти оморӣ 49,3 фоизи аҳолии кишварро занон ташкил медиҳанд ва имрӯз дар кишвар соҳае нест, ки занону бонувон дар он фаъолияти пурсамар надошта бошанд .
Занону духтарони лаёқатманд ва кордону ташаббускор ба хизмати давлатӣ ва идоракунии давлатӣ торафт бештар ҷалб гардида истодаанд. Инчунин,саҳми занону духтарон дар рушди соҳаҳои илму маориф, фарҳанг, тандурустӣ ва дигар самтҳои ҳаёти иҷтимоиву иқтисодии кишвар торафт афзун шуда истодааст.
Ҳоло дар кишвар 25 фоизи хизматчиёни давлатӣ, 73 фоизи кормандони соҳаи маориф, 71 фоизи кормандони соҳаи тиб, 47 фоизи кормандони соҳаи фарҳанг, 37 фоизи олимон ва 30 фоизи соҳибкоронро бонувону занон ташкил медиҳанд. Имрӯз беш аз 110 ҳазор бонувону занони кишвар ба фаъолияти соҳибкорӣ машғул мебошанд.
Дар замони соҳибистиқлолӣ зиёда аз 280 ҳазор нафар духтарон муассисаҳои таҳсилоти олиро хатм кардаанд, яъне соҳиби маълумоти олӣ гардидаанд. Аз оғози ҷорӣ гардидани квотаи президентӣ, яъне дар 28 соли охир 11 ҳазору 600 нафар духтарон муассисаҳои таҳсилоти олиро бо квотаи президентӣ хатм кардаанд. Илова бар ин, зиёда аз 35 ҳазор духтарону бонувон муассисаҳои таҳсилоти олии кишварҳои хориҷиро хатм карда, соҳибмаълумот шудаанд. Ҳоло аз 214 ҳазор нафар донишҷӯёни муассисаҳои таҳсилоти олии касбии кишвар 90 ҳазор нафар ё 42 фоизро духтарон ташкил медиҳанд.
Ҷумҳурии Тоҷикистон баъди расидан ба Истиқлоли давлатӣ ба гирдоби ҷанги таҳмилии шаҳрвандӣ афтод. Дар он айёми бисёр мудҳишу вазнин, ки фаъолияти сохтору мақомотҳои давлатӣ пурра фалаҷ гардида буданд, занону модарони тоҷик барои ба эътидол овардани вазъи кишвар азму талош варзида, дар роҳи расидан ба сулҳу субот ва ваҳдати миллӣ саҳми арзандаи худро гузоштанд. Айни ҳол, ҳазорҳо нафар занону бонувони қавиирода ва ҷасуру далери кишвари мо дар сафи Қувваҳои Мусаллаҳ ва мақомоти ҳифзи ҳуқуқ хизмати Модар – Ватанро адо карда, дар ҳифзи марзу буми кишвар ва тартиботу оромии ҷомеа баробари мардон адои вазифа карда истодаанд.
Ҳукумати кишвар, барои дастгирӣ ва ҳалли мушкилоти занону бонувон тамоми тадбирҳои заруриро амалӣ карда истодааст. Ҳоло дар ин самт якчанд стратегияву консепсия ва барномаҳои давлатӣ қабул гаштаанд. Пеш аз ҳама, Конститутсияи Ҷумҳурии Тоҷикистон аз 6 ноябри соли 1994, ки баробарии ҳуқуқу озодиҳои мардону занонро кафолат медиҳад ва баробари ин, як қатор барномаҳои давлатӣ ва стратегияҳо миллӣ ,аз ҷумла “Барномаи давлатии тарбия, интихоб ва ҷобаҷогузории кадрҳои роҳбарикунанда аз ҳисоби занону бонувони болаёқат барои солҳои 2017–2022” ва қабули барномаи нави мазкур барои солҳои 2023-2030, “Стратегияи миллии фаъолгардонии нақши занон дар Ҷумҳурии Тоҷикистон барои солҳои 2011–2020” ва нақшаи амалисозии он барои солҳои 2015–2020 ва қабули Стратегияи нави мазкур барои солҳои 2021 – 2030 ва нақшаи амалисозии он барои солҳои 2021 – 2025 таҳия ва ба тасвиб расонида, давра ба давра амали шуда истодаанд.
Бо мақсади ҳифз ва таъмини ҳуқуқу манфиатҳои занону оила ва барои кӯмаки ҳамаҷониба дар баланд бардоштани мақоми занон дар ҷомеа Кумитаи кор бо занон ва оилаи назди Ҳукумати Ҷумҳурии Тоҷикистон таъсис дода шуд. Дар баробари ин, дар кишвари мо, дигар санадҳои ҳуққуқӣ ва барномаҳои давлатӣ қабул шуданд, ки барои баланд бардоштани мақоми занон дар ҷомеа кафолат медиҳанд.
Ҷумҳурии Тоҷикистон бо Созмони Миллали Муттаҳид ҳамкории судманд менамояд ва Конвенсияи ин Созмонро дар бораи барњам додани тамоми шаклњои табъиз нисбати занон, Эъломияи умумии ҳуқуқи башар ва дигар конвенсияҳои байналмилалӣ оид ба муњофизати њуќуќи инсон, занон ва кӯдакон пурра дастгирӣ менамояд.
Кишвари мо, ҳамчунин бо Иттиҳоди Аврупо, Созмони амният ва ҳамкорӣ дар Аврупо ва бо сохторҳои минтақавӣ Иттиҳоди Давлатҳои Мустақил ва Созмони ҳамкории Шанхай нисбат ба масъалаҳои гендерӣ ва баланд бардоштани мақоми занон дар ҷомеа ҳамкорӣ менамояд.
Занону духтарони ҳунарманди тоҷик ғайр аз кору фаъолияти пурсамар дар соҳаҳои мухталифи кишвар дар озмунҳои минтақавӣ ва байналмилалӣ низ иштирок карда, соҳиби ҷоизаву ҷойҳои ифтихорӣ гардида истодаанд. Дар ин росто, онҳо имрӯз эҳёкунандаву нигоҳдоранда ва тарғибкунандаву посдорандаи фарҳангу таърих ва анъанаҳои миллии халқи тоҷик мебошанд. Маҳсули эҷоди бонувони ҳунарманд ва чеварону заргарони тоҷик дар якчанд намоишгоҳҳои сатҳи минтақавию ҷаҳонӣ гузошта шуда, маҳорату истеъдоди занону бонувони моҳири тоҷик баҳои баланд гирифт.
Ҳамин тариқ, маҳз ба шарофати Истиқлоли давлатӣ ва дастгириҳои ҳамаҷонибаи Президенти кишвар муҳтарам Эмомалӣ Раҳмон, мақоми занону бонувон дар тамоми соҳаҳои ҳаёти ҷомеа боз ҳам баланд гашт ва вазъи иҷтимоии онҳо беҳтар шуд. Кишвари мо, минбаъд ташаббусҳои занону бонувонро ҳамаҷониба дастгирӣ карда, барои баланд бардоштани мақом ва сатҳи маърифати онҳо, аз ҷумла омӯзонидани илму дониш, касбу ҳунар ва муҳайё кардани ҷойҳои корӣ ҳамаи тадбирҳои заруриро меандешад. Вобаста ба ин, занону бонувон ҳунару истеъдод, кӯшишу ғайрат, қобилияти ташкилӣ ва маҳорату кордонии худ худро ҷиҳати татбиқи сиёсати давлатӣ ва пешрафту ободии ҷомеа равона намоянд. Зеро, саҳми онҳо дар рушду инкишофи давлат ва ҳалли масъалаҳои муҳими ҷомеа бузург арзёбӣ мегардад.

Ҳошимов Фирӯз Ҷабборович,
муаллими калони кафедраи
ҷомеашиносии ДИС ДДТТ
дар ш.Хуҷанд

Nov 12

Мизи мудаввар дар мавзуи «Нақши Иҷлосияи XVI Шӯрои Олӣ дар рушду нумуи Ҷумҳурии Тоҷикистон»

Санаи 11 ноябри соли ҷорӣ, бахшида ба 32-юмин солгарди Иҷлосияи XVI Шӯрои Олии Ҷумҳурии Тоҷикистон бо ташаббуси кафедраи иқтисодиёти ҷаҳони ДИСДДТТ мизи мудаввар ташкил ва баргузор гардид.

Мизи мудавваро мудири кафедра н.и.и. Мухитдинова Ш.С. ҳусни оғоз бахшида, ҳамагонро бо ин санаи таърихӣ шодбош намуда, иброз дошт, ки маҳз ҳамин Иҷлосияи тақдирсоз барои мардуми шарифи кишвар сарвари оқилу кордон, матинирода ва марди хоксору ғамхорро барои ҳамчун роҳбари олӣ таъин намуд. Инчунин, бо шарофати ин санаи таърихӣ дар мамлакати ҷангзада сулҳу субот, амнияту осоиштагӣ пойдор гардид.
Сипас, муовини директор оид ба илм ва робитаҳои байналмиллаӣ н.и.и., дотсент Мирпочоев Д.А. оид ба нақши Иҷлосияи XVI Шӯрои Олии Ҷумҳурии Тоҷикистон дар рушди иқтисодиёти кишвар сухан ронданд.
Баъдан, маърузаи мутахассиси шуъбаи иттилоот ва ҷомеа Мамадҷонов Ф.С. дар мавзуи «Нақши Иҷлосияи XVI Шӯрои Олии Ҷумҳурии Тоҷикистон дар таҳкими сулҳу суботи Ҷумҳурии Тоҷикистон» шунида шуд, ки хеле ҷолиби диққат буд. Мамадҷонов Ф.С. ҳамчун як шахсе, ки дар рафти ин Иҷлосияи тақдирсоз ширкат варзида буданд, ба аҳли нишаст бисёр маълумотҳои муҳимро мавриди муҳокима қарор доданд.
Инчунин, донишҷўи курси 3, гуруҳи 25010407 ихтисоси молия ва қарз дар ФИБ Эргашева Нигина дар мавзуи «Аҳамияти иҷтимоии Иҷлосияи XVI Шӯрои Олии Ҷумҳурии Тоҷикистон» бо забони англисӣ баромад намуд.
Мизи мудавар ҷиҳати тарбиявӣ дошт, ки дар охир, донишҷўён доир ба Пешвои миллат, Тоҷикистон, Ватан, Истиқлолият шеърҳо қироат намуданд.
Боиси зикр аст, ки мизи мудаввар хеле хотирмон ва дар сатҳи баланд ташкил ва баргузор гардид.

Nov 09

ИШТИРОК ДАР КОНФЕРЕНСИЯИ ҶУМҲУРИЯВИИ ИЛМӢ-АМАЛӢ ТАҲТИ УНВОНИ “МАВҚЕИ ИҚТИСОДИ САБЗ ДАР ҲАЛЛИ МУШКИЛОТИ ЭКОЛОГӢ”

Дар доираи нақшаи чорабиниҳо барои солҳои 2020-2025 оид ба амалигардонии “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф” ва эълон гардидани солҳои 2022-2026 “Солҳои рушди саноат” дар филиали Донишгоҳи технологии Тоҷикистон дар шаҳри Исфара санаи 2 ноябри соли 2024 конференсияи ҷумҳуриявии илмӣ-амалии таҳти унвони “Мавқеи иқтисоди сабз дар ҳалли мушкилоти экологӣ” бахшида ба 80 – солагии собиқ директори таълимгоҳ доктори илмҳои иқтисодӣ, профессор, узви вобастаи Академияи муҳандисии Ҷумҳурии Тоҷикистон шодравон АҳадТешаев дар сатҳи баланд доир гардид.
Дар конференсияи мазкур, ректори Донишгоҳи технологии Тоҷикистон, профессор Раҳмонзода Зоир Файзалӣ (тариқи маҷозӣ), мудири бахши саноат ва энергетикаи мақомоти иҷроияи ҳокимияти давлатии шаҳри Исфара Қосимӣ Баҳромхон, муовини директор оид ба илм ва инноватсияи Донишкадаи политехникии Донишгоҳи техникии Тоҷикистон ба номи академик М. Осимӣ ,н.и.и. дотсент, Ахмедов Усмонҷон, муовини директори Донишкадаи иқтисод ва савдои Донишгоҳи давлатии тиҷорати Тоҷикистон н.и.и. Мирпочоев Далерҷон, д.и.и., профессори ҳамин донишкада Ғозибеков Садриддин, олимони Донишгоҳи кӯҳӣ металлургии Тоҷикистон, н.и.и., дотсент Саидов Мустафохон ва н.и.и. Раҳматов Абдумавлон ширкат варзиданд.
Ректори Донишгоҳи технологии Тоҷикистон, д.и.и., профессор Раҳмонзода З.Ф. ба кори конференсия ҳусни ифтитоҳ бахшида, ба кори конференсия барору комёбиҳо таманно намуд.

Сипас, директори Филиали Донишгоҳи политехникии Тоҷикистон, н.и.к. Абдуллоев Ҳошимҷон дар мавзуи “Мавқеи иқтисоди сабз дар ҳалли мушкилоти экологӣ” баромад намуда, оид ба мубрамияти ҳалли мушкилоти экологӣ дар шароити муосир ва роҳҳои ҳалли он маърӯзаи илмӣ намуд.
Муовини директори Донишкадаи политехникии Донишгоҳи техникии Тоҷикистон ба номи академик М. Осимӣ, н.и.и. Ахмедов У. доир ба мавзӯи “Формиравание зелёной экономики как фактор достижения устойчивого развития национальной экономики”, муовини директори ДИС ДДТТ н.и.и. Мирпочоев Д. дар мавзуи “Иқтисодиёти сабз ва масъалаҳои саноатикунонии кишвар: мушкилиҳо ва роҳҳои ҳал”, декани факултаи иқтисодиёт ва идора н.и.и.Ҳомидов И. дар мавзуи “Таҳсилоти олии касбӣ, илми сохтмон ва нақши профессор Тешаев Аҳад” бо маърӯзаҳои пурмуҳтаво баромад намуданд. Инчунин, профессор Ғозибеков С.А. баромад намуда, вобаста ба мушкилоти гузариш ба иқтисодиёти сабз ва баъзе самтҳои ҳалли масъалаҳои гузариш ба иқтисодиёти сабз фикри худро баён намуд.
Дар фарҷоми ҷаласаи ифтитоҳии конференсия барои маърӯзаҳои пурмӯҳтаво аз тарафи директори Филиали Донишгоҳи технологии Тоҷикистон дотсент Абдуллоев Ҳ. сипоснома супорида шуд.

Nov 04

Конститутсия – кафили ҳифзи ҳуқуқ ва озодиҳои инсон ва шаҳрванд

Дар ДИС ДДТТ конференсияи байналмилалии илмӣ-амалӣ бахшида ба 30-юмин солгарди Конститутсияи Ҷумҳурии Тоҷикистон таҳти унвони «Конститутсия – кафили ҳифзи ҳуқуқ ва озодиҳои инсон ва шаҳрванд” баргузор гардид. Конференсия бо сухани ифтитоҳии директори Донишкада, н.и.и., дотсент Ҷалилзода А.А. оғоз гардид, ки мавсуф ҳозирин ва устодону донишҷӯёнро ба муносибати баргузории конференсияи байналмилалӣ ва 30-юмин солгарди Конститутсияи давлатии Ҷумҳурии Тоҷикистон табрику таҳният намуд.

Дар конференсияи байналмилалӣ Мачехин Виктор Александрович, номзади илмҳои ҳуқуқшиносӣ, мудири лабораторияи таҳқиқотҳои сиёсати андози Академияи хоҷагии халқ ва идоракунии давлатии Россия дар мавзӯи “Конститутсия – кафили ҳифзи ҳуқуқ, озодиҳои инсон ва шаҳрванд” баромад намуд. Намояндаи мақомоти иҷроияи ҳокимияти давлатии вилояти Суғд Мирзоғуфрон Ғафурӣ табрикоти Раиси вилоятро ба муносибати 30-юмин солгарди Конститутсияи Ҷумҳурии Тоҷикистон ба самъи ҳозирин расонид.

Дар идомаи конференсия Ғафурӣ Меҳриддин Садриддинзода, номзади илмҳои ҳуқуқшиносӣ, сардори факултети 4-уми Вазорати корҳои дохилӣ, полковники милитсия дар мавзӯи “Моҳият ва таъиноти Конститутсияи Ҷумҳурии Тоҷикистон”, Маҳмудзода Олим Ҳомид, сардори шуъбаи муқовимат бо коррупсияи Раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар вилояти Суғд, подполковники адлия дар мавзӯи “Ислоҳоти асосии сохтори конститутсионӣ дар Ҷумҳурии Тоҷикистон” ва Ҷӯраева Донохон Тӯрахоновна, прокурори

шуъбаи назорати қонунӣ будани санадҳои судӣ бо парвандаҳои ҷиноятӣ, мушовири адлияи дараҷаи дуюм дар мавзӯи “Кафолатҳои конститутсионии ҳууқуқ ва озодиҳои инсон” баромадҳои пурмуҳтаво намуданд.
Ҳамчунин Нигора Ҳоҷибоева, доктори PhD, муаллими калони кафедраи ҳуқуқшиносии ДИС ДДТТ перомуни мавзӯи “Конститутсия – рамзи давлатдории миллӣ” суханронӣ намуд.
Дар фарҷоми ҷаласаи ифтитоҳии конференсияи байналмилалӣ аз тарафи директори Донишкада н.и.и., дотсент Ҷалилзода А.А. ба маърузачиён сипоснома ва туҳфаҳои хотиравӣ тақдим карда шуд.

Конференсия дар бахшҳо идома ёфта, мақолаҳои пешниҳодгардида дар шакли китоби алоҳида ба нашр хоҳад расид.

May 08

Конференсияи илмӣ-амалии вилоятии олимону профессорон ва муҳаққиқони ҷавон

Дар Донишкадаи иқтисод ва савдои ДДТТ бахшида ба Рўзи илми тоҷик конференсияи илмӣ-амалии вилоятии олимону профессорон ва муҳаққиқони ҷавон таҳти унвони “Роҳҳои ноилшавӣ ба ҳадафҳои стратегии Ҷумҳурии Тоҷикистон баҳри рушди босуботи иқтисодиёти миллӣ ва баландбардории сатҳи некўаҳволии халқ”, ки аз санаи 27 апрел то 3 майи соли 2024 идома ёфт, анҷом ёфт.
Дар ҷамъбасти конференсия директори Донишкада, н.и.и., дотсент Ҷалилзода А.А. иштирок ва суханронӣ намуда, баргузории конференсияро хеле муфид арзёбӣ карда, ғолибонро ба дастовардҳои илмӣ табрику таҳният гуфт. Дар оғоз барои фаъолияти пурсамар ва ҷашни мавлуд устоди Донишкада, профессор Комарова Г. Б. бо туҳфаи хотиравӣ қадрдонӣ карда шуд. Сипас барои иштироки фаъолона ва маърузаҳои пурмуҳтаво як қатор устодон ва донишҷӯёни фаъол бо диплом, сипоснома ва туҳфаҳои хотиравӣ қадрдонӣ карда шуданд. Ҳамчунин як зумра устодон бо нишони Аълочии маориф ва илми Ҷумҳурии Тоҷикистон, ифтихорномаҳои Вазорати маориф ва илми кишвар ва раёсати Донишкада қадрдонӣ карда шуданд. Барои ғолибият дар озмунҳои ҷумҳуриявӣ ва тасдиқи ҳимояи рисолаҳои номзадӣ як қатор устодон ва донишҷӯён бо диплом, ифтихорнома ва туҳфаҳои хотиравӣ сарфароз гардонида шуданд.
Мавриди зикр аст, ки конференсияи илмию амалии “Роҳҳои ноилшавӣ ба ҳадафҳои стратегии Ҷумҳурии Тоҷикистон баҳри рушди босуботи иқтисодиёти миллӣ ва баландбардории сатҳи некўаҳволии халқ” дар бахшҳои алоҳида идома ёфта, дар он беш аз 190 маърузаҳои илмии устодон, 200 маърӯзаи донишҷӯён ва 21 маърузаи магистрантон мавриди муҳокима қарор дода шуд. Дар назар аст, ки нигоштаҳои олимону муҳаққиқони ҷавон дар шакли маҷмуаи алоҳида ба нашр хоҳад расид.

Apr 09

Илм – фурӯғи маърифат

Санаи 08.04.2024 дар ДИС ДДТТ сатҳи донишкадавии озмуни ҷумҳуриявии “Илм – фурӯғи маърифат” аз рӯи номинатсияҳои математика, химия, технологияи информатсионӣ, география ва биология баргузор гардид. Дар озмун 215 нафар донишҷӯёну магистрантони беҳтарин, ки дар гурӯҳҳои академӣ ғолибон ҳисоб мешаванд, иштирок карданд. Аз рӯи натиҷа, 6 нафар донишҷӯ ба ҷойҳои 1, 2 ва 3 аз рӯи номинатсияи математика ғолиб омаданд. Аз рӯи натиҷаи технологияи информатсионӣ низ 6 нафар, аз рӯи номинатсияи биология 3 нафар, аз рӯи номинатсияи география 3 нафар ва аз рӯи номинатсияи химия 3 нафар ғолиб омаданд. Ҳамагӣ 21 нафар донишҷӯён ба даври шаҳрии озмун пешниҳод карда шуданд.

Jun 24

ТАШАККУЛИ ВАҲДАТ ВА ДАВЛАТИ МИЛЛӢ

Ваҳдати миллӣ омили муҳимтарини таҳкимбахши афкори тозаи давлатдории миллӣ мебошад ва замона тақозо дорад, ки ҷавонон бояд тафаккури ваҳдатзо дошта бошанд. Имрӯз ҷавонони мо дар қиёс ба ҷавонони як даҳсолаи пеш тафовути зиёд доранд. Ҷавонони имрӯза эҳсоси тааллуқ ва ҳувияти миллии хубе доранд. Бешак, ин эҳсос дар вуҷуди ҷавонони кишвари мо аз сиёсати созандаи роҳбарияти давлату Ҳукумати Ҷумҳурии Тоҷикистон сарчашма мегирад. Бинобар ин, масъалаи худшиносӣ ҳеҷ гоҳ аз шинохти таъриху тамаддун, шароити имрӯзаи Тоҷикистон ва минтақа ҷудо набуд ва нахоҳад монд. Яъне, ҷавони боҳувият ва худшиноси тоҷик бояд, ки бо дониши зарурӣ, донише, ки шоистаи ҷавони қарни XXI аст, мусаллаҳ ва муҷаҳҳаз бошад. Дар ин сурат, ин ҳувият манфиатҳои шахсӣ, иҷтимоӣ ва миллии ҷавононро бедор хоҳад кард.
Пӯшида нест, ки давлати миллӣ аз забон, тамаддун, таърих маншаъ мегирад. Аз ин бармеояд, ки давлат бо такя ба унсурҳои миллӣ тадриҷан ташаккул меёбад, шакл мегирад ва рушд мекунад. Давлати миллӣ маҷмӯи унсурҳои ба як миллати хос мансуббударо таҷассум мекунад ва он муваззаф аст забон, тамаддун, дину оин, анъана ва дар маҷмӯъ фарҳанги миллиро ташаккул диҳад. Чун ваҳдати миллӣ ҳамаи ин омилҳои ваҳдатсозро ҷамъбаст менамояд, месазад, ки онро чун омили муҳимтарини таҳкимбахши давлатдории нави миллӣ шиносем, ба он эҳтиром гузорем, онро густариш диҳем ва дар зиндагонии ҳаррӯза маҳаки аслии фаъолият қарор диҳем. Чаро ки ваҳдати миллӣ як самти муҳимтарини сиёсати пешгирифтаи роҳбарияти Тоҷикистони соҳибистиқлолро ташкил медиҳад ва саҳми он барои таҳкими рукнҳои давлати миллӣ муассир аст.
Дар сиёсати пешгирифтаи Сарвари давлат ваҳдати миллӣ ва арзишҳои миллӣ омили асосии таҳкимбахши давлати миллӣ маънидод мегарданд ва дар ин самт идеологияи давлати навини мо, ки барқарории сулҳ ва таҳкими ваҳдати миллиро ҳадаф қарор додааст, кори зиёдеро дар амал татбиқ кард. Ба шарофати он тамоми мадраку афкори давлатдории миллӣ атрофи ҳамин ғояи сиёсӣ мечархад.
Аз ҷониби дигар, пешниҳодҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон Эмомалӣ Раҳмон аз минбарҳои баланди СММ ва аз ҷониби ҷомеаи ҷаҳонӣ ҳамовозӣ пайдо намудани онҳо худ гувоҳи онанд, ки идеологияи навини давлатдории тоҷикон ҷанбаи миллӣ дошта, на танҳо мафкура ва афкори миллати тоҷик, балки маҷмӯи бузурги ҷаҳонбинии халқҳои ҷаҳонро дар худ таҷассум мекунад. Ин гувоҳи он аст, ки идеологияи давлати нави миллии мо барои на танҳо мо, балки баҳри башарият фикри нав, андешаи нав, ҷаҳонбинии нав ва сиёсати навро ҳадафи аслӣ қарор додааст ва ин омилҳо барои рушди афкори башар ба таври ҷовидонӣ хизмат менамоянд.
Бо фарорасии фазои мустақили сиёсиву иқтисодӣ ва фарҳангӣ, ки имрӯз ба шарофати Пешвои муаззами миллат насиби мо гардидааст, вазифаҳои мо – ватандорон, боз ҳам афзун гардид. Тоҷикистон, ки имрӯз ба сӯйи ҷомеаи демокративу дунявӣ қадамҳои устувор мениҳад, бе ваҳдати ақлу амали ҳар сокини худ наметавонад аз ин имтиҳони ҷиддии таърих гузарад. Инкишофи замони ҳозира ба кашфи техникаи нав, ихтироот, заҳмату талош, робита бо давлатҳои пешрафтаи дунё ниёз дорад.
Тоҷикистонро ҷомеаи ҷаҳонӣ чун кишвари озод эътироф кардааст, мо – шаҳрвандони он бояд мисли шохобҳои як рӯд, гулҳои як боғ, фарзандони як модар амал намуда, дар бунёди Тоҷикистони навин саҳм бигузорем.

Т.САЛИМОВ

May 18

Дарс аз фанни забони тоҷикӣ барои донишҷӯёни хориҷӣ

Мо дар доираи барнома бо шарикони UNICAC дар мавзӯи зерин вохӯрӣ доштем: Рушди потенсиалҳо барои ҳамкориҳои байналмилалӣ дар соҳаи таълим/омӯзиш/таҳқиқот – 3.7 Санҷиши пилотӣ: Амалҳои мобилии донишҷӯён ва профессорон. Дар консорсиум аз Донишгоҳи Торино (Италия), Донишгоҳи илмҳои амалии Лауреа (Финляндия), Институти иқтисод ва савдои Донишгоҳи давлатии Тоҷикистон (Тоҷикистон), Донишгоҳи миллии Узбакистон (Ӯзбекистон) ва Донишгоҳи технологияҳои иттилоотии Тошканд иштирок доштанд. Узбекистон).
Ба шарофати ин чорабинӣ ман бо донишҷӯёни хориҷӣ дар мавзӯи «Хусусиятҳои алифбо ва садоҳои тоҷикӣ» дарси ҷолиб гузаронидам. Мақсади ин дарс ба хориҷиён додани мавод дар бораи шабоҳат ва фарқияти талаффуз ва навиштани ҳарфҳо ва садоҳои тоҷикӣ ва англисӣ буд. Дар рафти дарс мо бештар дар бораи пайдоиши забон, фарханг ва таърихи алифбоамон бисёр сухан рафтем. Донишҷӯён хеле фаъол ва дилчасп буданд ва аз рӯи мавзӯъҳои зикршуда чизҳои зиёде гирифтанд. Дар рафти дарс хонандагон ин забонро машқ карда, бо мо ба забони тоҷикӣ муошират мекарданд.

IMG_9348