Category: Конференсияҳо ва чорабиниҳои илмӣ

Дар Донишкадаи иқтисод ва савдои ДДТТ бахшида ба Рўзи илми тоҷик конференсияи анъанавии илмию амалии олимону профессорон ва муҳаққиқони ҷавон таҳти унвони “Ҷанбаҳои мухталифи рушди “Иқтисодиёти сабз” дар Ҷумҳурии Тоҷикистон” баргузор гардид.

Конференсия бо сухани ифтитоҳии директори донишкада, номзади илмҳои иқтисод, дотсент Ҳошимзода Ҳомид Ҳасан оғоз гардид. Мавсуф зимни суханронӣ таъкид намуд, ки Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Паёми хеш ба Маҷлиси Олӣ оид ба пешрафти соҳаҳои мухталифи хоҷагии халқи мамлакат, бахусус, рушди иқтисодиёти сабз, саноатикунонии босуръати кишвар, эълон шудани солҳои 2022-2026 “Солҳои рушди саноат” ва тақвияти тафаккури техникии ҷавонону наврасон дастурҳои мушаххас доданд. Дар ин замина, дар донишкада пайваста конференсияҳои ҷумҳуриявӣ, вилоятӣ ва донишкадавӣ баргузор мегарданд ва мақолаҳои пешниҳодгардидаи устодону муҳаққиқон дар шакли китоби алоҳида ба нашр мерасанд.

Баъди сухани ифтитоҳии директори донишкада, номзади илмҳои иқтисод, дотсент Ҳошимзода Ҳомид Ҳасан маърӯзаҳои устодон: Алиҷонов Ҷамшед Абдуқаюмович, д.и.и., профессори кафедраи назарияи иқтисоди Донишгоҳи давлатии Хуҷанд ба номи академик Б. Ғафуров дар мавзӯи ““Иқтисодиёти сабз” – асоси таъмини консепсияи рушди устувор дар Ҷумҳурии Тоҷикистон”, Дониёрова Мунира Муҳаммадқуловна, н.и.б., дотсенти кафедраи ҷомеашиносӣ дар мавзӯи “Защита ледников Таджикистана – важное условие “зелёной экономики” шунида мавриди муҳокима баррасӣ қарор гирифтанд.
Ҳамчунин дар конференсияи мазкур Саидова Дилноза Комилҷоновна, магистранти бахши якум, ихтисоси 1-250103- иқтисодиёти ҷаҳон дар мавзӯи “Green Economy Development: experience of developing countries” ва Қушмуродова Тиллохон, донишҷӯи бахши якум, ихтисоси 1-260202-менеҷмент перомуни мавзӯи “Ледники Таджикистана – главный источник водных ресурсов Центральной Азии” маърӯзаи пурмуҳтаво намуданд.

Конференсияи илмию амалии “Ҷанбаҳои мухталифи рушди “Иқтисодиёти сабз” дар Ҷумҳурии Тоҷикистон” то санаи 18 апрели соли 2023 дар бахшҳои алоҳида идома хоҳад кард.
Дар назар аст, ки дар конференсия 200 нафар устодон ва беш аз 180 нафар донишҷӯён мақолаҳои худро мавриди таҳқиқу баррасӣ қарор дода, нигоштаҳои олимону муҳаққиқони ҷавон дар шакли маҷмуаи алоҳида ба нашр хоҳад расид.

Дар ҷамъбасти конференсия директори ДИС ДДТТ, н.и.и., дотсент Ҳошимзода Ҳомид Ҳасан ба иштирокчиён арзи сипос карда, баргузории чунин чорабиниҳоро барои омӯзгорону донишҷӯён муфид арзёбӣ намуд.

Сипас маърӯзаи дотсенти кафедраи ҷомеашиносӣ, н.и.б., Дониёрова М.М. дар мавзӯи “Татбиқи Барномаҳои давлатӣ оид ба ҳифзи пиряхҳо дар Ҷумҳурии Тоҷикистон”, маърӯзаи профессори кафедраи молшиносӣ ва фаъолияти гумрукӣ, н.и.х. Қобилов Н. таҳти унвони “Таркиби химиявӣ ва хусусиятҳои шифобахшии оби шифои “Зумрад” ва маърӯзаи муаллими калони кафедраи молия ва қарз Абдуҳамидова Гулбаҳор дар мавзӯи “Об – манбаъ ва чароғи равшандиҳандаи созгори дунёи ҳастӣ” шунида ва мавриди муҳокима қарор гирифт.

Санаи 8-уми сентябри соли ҷорӣ бахшида ба таҷлили 31-умин солгарди Истиқлоли давлатии Ҷумҳурии Тоҷикистон дар Донишкадаи иқтисод ва савдои ДДТТ конференсияи илмӣ-адабӣ баргузор гардид.

Конференсияро муовини директор оид ба илм ва робитаҳои байналмилалӣ н.и.и., дотсент Мирпоччоев Д. ифтитоҳ намуда, вобаста ба дастовардҳои даврони соҳибистиқлолӣ андешаҳои ҷолиб иброз намуд.

Сипас, муаллими калони кафедраи ҷомешиносӣ Ф. Ҳошимов дар мавзуи «Истиқлоли давлатӣ ва дастовардҳои сиёсати хориҷии Ҷумхурии Тоҷикистон» маърӯза намуда, оид ба нақши сазовори Пешвои миллат, муҳтарам Эмомалӣ Раҳмон дар таҳкими сиёсати хориҷии мамлакат бо далелу арқоми мустанад, андешаронӣ намуд.

Баъдан, мутахассиси Раёсати кор бо ҷавонон ва варзиши вилояти Суғд Беҳрӯз Олимҷонов суханронӣ намуда, саҳми арзандаю беназири Асосогузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро дар дастгириву ташаккули сиёсати давлатии ҷавонон, рушди ҳамаҷонибаи онҳо, хусусан дар самти аз худ намудани забонҳои хориҷӣ ва улуми муосир, таъкид намуд.

Устоди кафедраи назарияи иқтисоди факултети молия ва баҳисобгирии бухгалтерии донишкада Фарҳод Раҳмонов маърӯзаи илмӣ намуда, оид ба дастовардҳои иқтисодӣ ва ҳалли муаммоҳои ҷойдоштаи соҳаи саноату иқтисоди миллӣ андешаҳои муфиди илмӣ баён намуд.

Дар фарҷоми конференсия аз ҷониби донишҷӯёну магистрантони донишкада бахшида ба Истиқлоли давлатӣ шеъру сурудҳои дилпазир иҷро гардида, саҳнаҳои ҷолиби диққат намоиш дода шуданд.

Ҳамин тавр, конференсия дар фазои идонаву муҳокимапардозии муфид вобаста ба арзишмандтарин ҷашни миллату давлати мо-Истиқлоли давлатӣ баргузор гардида, ба кори худ ҳусни анҷом бахшид.

Дар Донишкадаи иқтисод ва савдои ДДТТ бо иштироки доираи васеи рӯзноманигорон нишасти матбуотӣ оид ба натиҷаи фаъолияти Донишкада дар нимсолаи аввали соли 2022 баргузор гардид. Дар нишасти матбуотӣ мудири шуъбаи рушди иҷтимоӣ ва робита бо ҷомеаи дастгоҳи раиси вилояти Суғд Тоҷибой Султонзода ва наздик ба 30 нафар намояндагони васоити ахбори омма ширкат намуданд. Дар оғоз директори Донишкада номзади илмҳои иқтисод, дотсент Ҳошимзода Ҳомид Ҳасан аҳли нишастро хайрамақдам гуфта, оид ба фаъолияти пурсамар ва дастовардҳои назарраси донишкада дар нимсолаи аввали соли 2022 маълумот дод.

Муассисаи давлатии таълимии «Донишкадаи иқтисод ва савдои Донишгоҳи давлатии тиҷорати Тоҷикистон дар шаҳри Хуҷанд» (ДИС ДДТТ), ки муассиси он Иттифоқи Тоҷикматлубот мебошад, тибқи Қарори Ҳукумати Ҷумҳурии Тоҷикистон таҳти №59, аз 12 феврали соли 2010 таъсис дода шудааст. Донишкада моҳи майи соли 2021 аз аккредитатсияи давлатии Агентии назорат дар соҳаи маориф ва илми назди Президенти Ҷумҳурии Тоҷикистон гузашта, соҳиби Шаҳодатномаи Т-АД №0000242 аз 9.07.2021 гардид.

Донишкадаи иқтисод ва савдои Донишгоҳи давлатии тиҷорати Тоҷикистон тибқи Иҷозатнома оид ба ҳуқуқи пешбурди фаъолияти таълимӣ дар зинаҳои бакалавриат аз рӯйи 28 ихтисос, магистратура аз рӯйи 8 ихтисос, докторантура PhD аз рӯйи 4 ихтисос ва дар зинаи таҳсилоти олии дуюм аз рӯйи 5 ихтисос мутахассисонро тайёр менамояд.
“Заминаи моддиву техникии Донишкада ҷавобгӯи талаботи стандарти давлатии таҳсилоти олии касбӣ мебошад. Ҷараёни таълим дар чор бинои таълимӣ, ки аз 115 синфхонаи алоҳида иборатанд, ташкил карда шудааст. Дар Донишкада 802 адад компютери замонавӣ, 70 адад ноутбук, 107 адад принтер, 37 адад тахтаи электронӣ, 18 адад экран барои проектор, 107 адад проектор, 178 адад камераи мушоҳидавӣ мавҷуд буда, биноҳои таълимӣ бо Wi-Fi таъмин карда шудаанд. Инчунин дар Донишкада се адад китобхонаи анъанавӣ ва электронӣ, толори Интернет, озмоишгоҳҳои бонки таълимӣ, молшиносӣ ва муоинаи молҳои истеъмолӣ, криминалистика, синфхонаи компютерии тиҷорати электронӣ, синфхонаи компютерии инноватсионӣ барои омӯзиши барномаи 1С – корхонаҳо, синфхонаи компютерии таълимии омор, утоқҳои лингофонӣ, ду маҷлисгоҳ бо 250 ва 90 ҷойи нишаст, се толори конференсия, майдончаи варзишии замонавӣ ва ду толори фитнесс, ду Парки технологӣ, ду ошхона, хобгоҳи донишҷӯён ва бунгоҳи тиббӣ мавҷуд аст. Ҳамаи биноҳои Донишкада дар давраи сармо тариқи мутамарказ то ҳарорати муқарраршуда гарм карда мешаванд”-таъкид намуд Ҳ. Ҳошимзода.
Мавриди зикр аст, ки теъдоди профессорону омӯзгорон 250 нафарро ташкил медиҳад. Аз шумораи умумии устодону омӯзгорони муқимӣ 96 нафар дорои дараҷа ва унвони илмӣ (11 нафар доктору профессор ва 85 нафар номзади илму дотсент) мебошанд. Баҳри баландбардории сатҳи некӯаҳволии ҳайати профессорону устодон моҳи феврали соли 2022 дар ҷаласаи Шӯрои олимон озмуни ишғоли вазифаҳои ҳайати профессорону омӯзгорон гузаронида шуд, ки 42 нафар устодон дар озмун иштирок намуда, аз рӯи натиҷаи овоздиҳии пинҳонӣ 3 нафар ба вазифаи профессори кафедра, 1 нафар ба вазифаи мудири кафедра, 17 нафар ба вазифаи дотсенти кафедра, 4 нафар ба вазифаи номзади илм, муаллими калон ва 17 нафар ба вазифаи муаллими калон таъин карда шуданд.

Теъдоди умумии донишҷӯён дар маҷмӯъ 3764 нафарро ташкил намуд, ки аз ин шумора 1930 нафар дар шуъбаи рӯзонаи зинаи бакалавр (529 нафар духтарон), 99 нафар дар шуъбаи рӯзонаи зинаи магистратура (46 нафар духтарон), 339 нафар дар шуъбаи ғоибонаи зинаи бакалавр (178 нафар духтарон), 1389 нафар дар шуъбаи таҳсилоти фосилавӣ (387 нафар духтарон) ва дар зинаи докторантура аз рӯи ихтисос PhD 7 нафар (1 нафар духтар) таҳсил намуда истодаанд.
Дар соли таҳсили 2021-2022 Донишкадаро 899 нафар, аз ҷумла: дар зинаи бакалавриат, шуъбаи рӯзона – 437 нафар, дар шуъбаи омӯзиши фосилавӣ ва ғоибона – 424 нафар, дар зинаи магистратура – 38 нафар ва бо дипломи аъло – 37 нафар хатм намуданд.
Донишкада бо зиёда аз 240 корхона, ширкат, бонк, муассисаю ташкилот, мақомоти ҳифзи ҳуқуқ ва мақомоти идоракунии маҳаллию давлатӣ шартномаҳои тарафайн дорад.
Дар давраи ҳисоботӣ 6 нафар омӯзгорон рисолаҳои номзадиро сарбаландона ҳимоя намуданд. Рисолаҳои илмии 15 нафар унвонҷӯ ва аспирант таҳия карда шуда, барои ҳимоя омода карда шудаанд.

Нимсолаи аввали соли 2022 дар кафедраҳои Донишкада 144 адад маърӯзаи ҳайати профессорону устодон дар семинарҳои илмӣ-назариявии кафедраҳо баррасӣ гардиданд.
Донишҷӯёни Донишкада дар озмуни ҷумҳуриявии “Донишҷӯ ва пешрафти илмию техникӣ” фаъолона ширкат варзида, сазовори дипломҳои дараҷаи 1, 2 ва 3 гардиданд.
Дар озмуни ҷумҳуриявии “Илм фурӯғи маърифат” донишҷӯи курси 1, ихтисоси 25010407, Абдураҳмонова Ш. аз рӯи номинатсияи “Биология” дар сатҳи шаҳрӣ сазовори ҷойи 2-юм гардид.
Моҳи апрели соли 2022 дар Донишкада даври ҷамъбастии озмуни “Фурӯғи субҳи доноӣ китоб аст” аз рӯи номинатсияҳо баргузор шуд, ки 3 нафар аз рӯи номинатсияи адабиёти классикӣ, 3 нафар аз рӯи номинатсияи адабиёти муосир ва 4 нафар донишҷӯ аз рӯи номинатсияи адабиёти ҷаҳон ба даври шаҳрӣ роҳхат гирифтанд. Дар даври шаҳрии озмун Холматов Фирдавс, донишҷӯи курси 3 барои иштироки фаъолона сазовори диплом гардид.

Мақсади асосии робитаҳои байналмилалии Донишкада таъмини байналмилалигардонии раванди таълим, омӯзиш ва илм дар доираи барномаҳо ва лоиҳаҳо ба шумор меравад. Донишкада бо зиёда аз 70 донишгоҳи бонуфузи олам ҳамкории тарафайн барпо намуда, дар ҳамкорӣ бо шарикони рушд фаъолияти пурсамар дорад.
Нимаи аввали соли 2022 дар доираи барномаи ЭРАСМУСӮ 12 нафар устодон ва 7 нафар магистрантону донишҷӯён ба Донишгоҳи Турини Италия, Донишгоҳи миллии Ӯзбекистон, Донишгоҳи Лауреаи Финляндия, Донишгоҳи Севилияи Испания, Донишгоҳи технологияҳои информатсионии ш.Тошканд барои мубодилаи таҷриба ба сафари омӯзишӣ фаро гирифта шуданд. Дар давраи ҳисоботӣ 5 нафар омӯзгор ва 3 нафар донишҷӯ дар Донишгоҳи Кантабрия, 3 нафар омӯзгор ва 2 нафар донишҷӯ дар Донишгоҳи Кордоба, 1 нафар омӯзгор ва 2 нафар аспирант дар Донишгоҳи Севилия, 4 нафар омӯзгор ва 5 нафар донишҷӯ дар Донишгоҳи Лауреа, дар маҷмӯъ 26 нафар омӯзгору корманд ва 30 нафар аспиранту донишҷӯ барои мубодила ва омӯзиш фаро гирифта шуданд. Ҳамчунин ба Донишкада 22 нафар коршиноси хориҷӣ аз давлатҳои пешрафта ташриф оварданд.

Дар доираи татбиқи «Консепсияи миллии тарбия дар Ҷумҳурии Тоҷикистон» дар Донишкада 58 чорабинии сатҳи гуногун гузаронида шуд.
Мавриди зикр аст, ки дар нишасти матбуотӣ намояндагони васоити ахбори умум фаъолона иштирок карда, саволҳои худро перомуни ба ҷойи кор таъмин намудани хатмкунандагон, таҳсили шаҳрвандони хориҷӣ, робитаҳои байналмилалӣ, имтиёзҳои махсус ба донишҷӯён, фаъолияти гуруҳҳои таҳсил бо забони англисӣ, ба сафи хидмати ҳарбӣ ҷалб гардидани хатмкунандагон, теъдоди хориҷшудагон, таъсиси ихтисосҳои нав, мушкилоти асосии донишкада, иштирок дар олимпиадаҳои ҷумҳуриявӣ, таҳсили устодону донишҷӯён дар хориҷи кишвар, дастгирии ятимону бепарасторон ва ғайра пешниҳод карда, посухҳои муфассал гирифтанд.