Category: Олимпиадаҳо ва озмунҳо

Nov 28

Ҷамбасти Спартакиада дар ДИС ДДТТ!

Бахшида ба Рӯзи Парчами давлатӣ дар ДИС ДДТТ спартакиадаи омӯзгорон баргузор гардид. Дар чорабинии мазкур мусобиқаҳои варзишӣ оид ба шашка, шоҳмот ва тенниси рӯи миз гузаронида шуданд.

   Дар спартакиада Инъомхӯҷа Бузруков-раиси иттифоқи касабаи кормандони соҳаи савдо, кооператсияи матлубот ва корхонаҳои хусусии вилояти Суғд, Хайруллохон Ҷамолов – раиси кумитаи иттифоқи касабаи муассисаҳои давлатӣ, Фарҳод Холмирзоев – муовини раиси иттифоқи касабаи кормандони соҳаи савдо, кооператсияи матлубот ва корхонаҳои хусусии вилояти Суғд иштирок намуда, рафти баргузории мусобиқаҳои варзиширо назорат намуданд. Дар натиҷа аз рӯи намуди шашка ғолибият насиби Нигина Муъминова, Матлуба Холназарова ва Адиба Ахмедова гардид. Дар намуди шоҳмот пирӯзӣ насиби Усмон Ҷабборов, Акбарҷон Аҳроров ва Муқаддас Набиева гашт. Дар мусобиқаи тенниси рӯи миз Садриддин Ғозибеков, Акмал Пӯлотов ва Саодат Аминҷонова пирӯз гардиданд. Дар поёни чорабинӣ дар вазъияти тантанавӣ ба ғолибон диплом, медал, сипоснома ва туҳфаҳои хотиравӣ супорида шуд.

Nov 05

Баргузории даври дуввуми олимпиада аз фанни географияи иқтисодии Тоҷикистон бо асосҳои демография дар Донишкадаи иқтисод ва савдои Донишгоҳи давлатии тиҷорати Тоҷикистон

Бо мақсади ҷалб намудани донишҷӯён ба донишандӯзӣ ва дарёфти донишҷӯёни болаёқат санаи 04.11.2024 даври дуввуми олимпида аз фанни географияи иқтисодии Тоҷикистон бо асосҳои демография ташкил ва гузаронида шуд, ки дар он 12 нафар донишҷӯён иштирок намуданд. Дар даври дуввум довталабон аз рӯи ду шарт: кор бо тестҳо ва саволҳои хаттӣ қувваозмоӣ намуданд.
Боиси зикр аст, ки олимпиадаро устодони кафедраи иқтисодиёти ҷаҳон Шораҷабова Ш., Раҳимова А. ва Зикриёева Ҳ. дар сатҳи баланд ташкил ва баргузор намуданд.
Бояд қайд намуд, ки аз тарафи ҳайъати ҳакамон ғолибони даври дуввум муайян гардида, барои иштирок ба давари сеюм пешниҳод карда мешаванд.

Oct 25

Озмуни вилоятии «Беҳтарин донандаи Конститутсия»

Санаи 18-уми октябри соли 2024 тибқи мактуби Раёсати Донишгоҳи давлатии ҳуқуқ, бизнес ва сиёсати Тоҷикистон бахшида ба ба 30-солагии Конститутсияи Ҷумҳурии Тоҷикистон ва «Соли маърифати ҳуқуқӣ» озмуни вилоятии «Беҳтарин донандаи Конститутсия» баргузор гардид.

Дар озмуни вилоятӣ аз Донишкадаи иқтисод ва савдои Донишгоҳи давлатии тиҷорати Тоҷикистон донишҷўи бахши 4-уми ихтисоси 24010302-танзими ҳуқуқии молия ва қарз Бобоев Дилшод Ҳошимбоевич аз рўи номинатсияи «Беҳтарин донандаи Конститутсия» ва донишҷўи бахши 2-юми ихтисоси 240103-ҳуқуқи иқтисодӣ Хаёлов Шаҳдӣ Мирзоҳакимович аз рўи номинатсияи «Беҳтарин мақола дар бораи Конститутсия» иштирок намуданд. Барои иштироки фаъолона дар баланд бардоштани маърифати ҳуқуқӣ, эҳтироми қонун ва ҳифзи манфиатҳои миллӣ, боло бурдани сатҳи фарҳанги конститутсионӣ ва ташаккули низоми устувори рафтори ҳуқуқӣ дар озмуни вилоятӣ донишҷўи бахши 4-уми ихтисоси 24010302-танзими ҳуқуқии молия ва қарз Бобоев Д.Ҳ. аз рўи номинатсияи «Беҳтарин донандаи Конститутсия» сазовори дипломи дарачаи 3 ва тўҳфаи пулӣ ба миқдори 500 сомонӣ, ва донишҷўи бахши 2-юми ихтисоси 240103-ҳуқуқи иқтисодӣ Хаёлов Ш.М. аз рўи номинатсияи «Беҳтарин мақола дар бораи Конститутсия» сазовори дипломи дараҷаи 2 ва тўҳфаи пулӣ ба миқдорӣ 700 сомонӣ гардиданд.

May 18

Тақдими Стипендияи Раиси вилояти Суғд ба 46 нафар донишҷӯёну магистрантон ва докторантони ДИС ДДТТ

Донишкадаи иқтисод ва савдои ДДТТ солҳои охир ба дастоварду комёбиҳои назаррас ноил гашта истодааст. Соли равон 46 нафар, аз ҷумла 11 аспиранту докторант, 5 нафар магистр ва 30 нафар донишҷӯёни Донишкада ба гирифтани Стипендияи Раиси вилояти Суғд мушарраф гаштанд, ки мо бо ин дастоварди арзанда ҳамаи ғолибонро табрик намуда, барояшон фатҳи баланди қуллаҳои илму донишро таманно менамоем.

 

Mar 13

Озмуни ҷумҳуриявии “Фурӯғи субҳи доноӣ китоб аст” дар ДИС ДДТТ

Санаи 12.03.2024 сатҳи донишкадавии озмуни ҷумҳуриявии “Фурӯғи субҳи доноӣ китоб аст” дар Донишкадаи иқтисод ва савдои ДДТТ баргузор гардид. Дар он зиёда аз 50 нафар донишҷӯён ширкат варзиданд. Тибқи номинатсияҳои озмун 6 нафар донишҷӯ аз рӯи номинатсияи адабиёти ҷаҳон, 6 нафар донишҷӯ аз рӯи номинатсияи адабиёти классикӣ, 3 нафар донишҷӯ аз рӯи номинатсияи адабиёти муосир ва 1 нафар донишҷӯ аз рӯи номинатсияи эҷоди назм ба сатҳи шаҳрӣ роҳхат гирифтанд. Бояд қайд кард, ки донишҷӯёни Донишкада бисёртар дар самти иқтисодиёт, ҳуқуқ ва идоракунӣ таҳсил менамоянд, лекин ба ин нигоҳ накарда, бисёр донишҷӯён ба хондани китобҳои адабиву бадеӣ шавқу рағбат доранд. Ҳамчунин, дар кафедраҳои забонҳои тоҷикӣ ва русӣ ва забонҳои хориҷӣ маҳфилҳои илмии донишҷӯён амал мекунад, ки устодон донишҷӯёнро ба хондани китобҳо ҷалб мекунанд. Тибқи натиҷаи озмун ғолибон бо дипломҳои дараҷаи 1, 2, 3, ифтихорномаҳо ва туҳфаҳои хотиравӣ дар рӯзҳои ҷавонон қадрдонӣ хоҳанд шуд.

 

Mar 09

Санаи 9-уми марти соли равон дар Донишкада бо ташаббуси шуъбаи тарбия бахшида ба «Соли маърифати ҳуқуқӣ» ва ба муносибати 30-юмин солгарди қабули Конститутсияи Ҷумҳурии Тоҷикистон ва бо мақсади баланд бардоштани маърифати ҳуқуқии муҳассилин ва эҳтирому риояи санадҳои меъёрии ҳуқуқӣ озмун таҳти унвони «Маърифати ҳуқуқӣ- омили муҳимтарини тарбияи шахс» баргузор гардид. Дар озмуни мазкур донишҷўёни ҳар се факултет ба тариқи даставӣ иштирок карда, аз рўи шартҳои саволу ҷавоб, пешниҳоди газетаи деворӣ ва видеоролики беҳтарин баромад намуданд.
Аз рўи натиҷаи ҷамъбасти озмун ҷои якум насиби дастаи донишҷўёни факултети тиҷорат, фаъолияти гумрукӣ ва ҳуқуқ, ҷои дуюм дастаи донишҷўёни факултети молия ва баҳисобгирии бухгалтерӣ ва ҷои сеюмро дастаи муҳассилини факултети иқтисодиёт ва технологияҳои инноватсионӣ соҳиб гардиданд. Ғолибони озмун бо диплом ва тўҳфаҳои хотиравии раёсати Донишкада қадрдонӣ карда шуданд.

Feb 22

Манижа Машокирова сазовори Шоҳҷоизаи озмуни “Аллаи Модар” гардид!

Бо ибтикори Кумитаи иҷроияи ҲХДТ дар шаҳри Хуҷанд озмуни вилоятии “Аллаи Модар” бахшида ба таҷлили Рӯзи Модар ва 30-солагии таъсисёбии ҲХДТ дар байни бонувони ташкилотҳои ибтидоӣ баргузор гардида, беҳтаринҳо муайян ва қадршиносӣ карда шуданд. Боиси ифтихор аст, ки донишҷӯи соли сеюм, ихтисоси иқтисодиёти ҷаҳон, гурӯҳи таҳсил бо забони англисӣ Манижа Машокирова бо ҳунару истеъдоди баланди хеш сазовори Шоҳҷоизаи озмуни “Аллаи Модар “ гардид. Мо ба ин дастоварди арзанда Манижа Машокироваро табрик гуфта, барояш комёбиҳои нав ба нав таманно менамоем.

Feb 21

Имтиҳонҳои худсанҷишии хатмкунандагон барои муайян намудани “Довталаби беҳтарини ДИС ДДТТ”

Дар Донишкадаи иқтисод ва савдои ДДТТ дар ҳамкорӣ бо Маркази миллии тестии назди Президенти Ҷумҳурии Тоҷикистон дар вилояти Суғд бо иштироки беш аз ҳазор нафар хатмкунандагони муассисаҳои таълимии ноҳияи Бобоҷон Ғафуров ба мақсади муайян намудани “Довталаби беҳтарини ДИС ДДТТ” имтиҳонҳои худсанҷишии хатмкунандагон баргузор гардид.
Раванди баргузории имтиҳонҳои санҷиширо кормандони Маркази миллии тестии назди Президенти Ҷумҳурии Тоҷикистон дар вилояти Суғд ва устодони Донишкада назорат намуда, ба кори иҷронамудаи хатмкунандагон баҳогузорӣ намуданд.
Мавриди зикр аст, ки озмуни “Довталаби беҳтарини ДИС ДДТТ” санаҳои 21 феврал бо иштироки хатмкунандагони ноҳияи Бобоҷон Ғафуров, санаи 22 феврал бо ширкати хатмкунандагони муассисаҳои таълимии шаҳри Хуҷанд ва санаи 23 феврал бо иштироки хатмкунандагони дигар шаҳру навоҳии вилояти Суғд гузаронида шуда, ҷамъбасти озмун санаи 24 феврал дар Рӯзи дарҳои кушод дар толори асосии Донишкада баргузор мегардад ва беш аз 50 нафар беҳтаринҳо бо туҳфаҳои хотиравӣ сарфароз гардонида мешаванд.
Feb 14

Озмуни вилоятии «Аллаи Модар»

Санаи 14-уми феврали соли равон дар Донишкада даври муассисавии озмуни вилоятии «Аллаи Модар», бахшида ба Рўзи бонувон баргузор гардид. Дар озмуни мазкур Машокирова Манижа донишҷўи курси 3, ихтисоси 250103а, Ҷўраева Шаҳзода донишҷўи курси 2, ихтисоси 250108тб ва Ҳошимзода Моҳизарат донишҷўи курси 1, ихтисоси 24010220т аз рўи номинатсияҳои муқарраргардида баромад намуданд. Ҳамаи иштирокчиёни озмун барои ширкати фаъолона ва нишон додани малакаю маҳорати хоса бо Сипоснома ва туҳфаҳои хотиравии раёсати Донишкада қадрдонӣ карда шуданд.