Dec
08
Иҷрои нақшаи чорабиниҳои дохилиидоравӣ ҷиҳати амалисозии «Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030»
Санаи 5-уми декабри соли равон дар факултети тиҷорат, фаъолияти гумрукӣ ва ҳуқуқ бо мақсади иҷрои нақшаи чорабиниҳои дохилиидоравӣ ҷиҳати амалисозии «Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030» ва тибқи Нақшаи баргузории чорабиниҳои маърифатӣ-иттилоотии зиддикоррупсионии Агентии назорати давлатии молиявӣ ва мубориза бо коррупсияи Ҷумҳурии Тоҷикистон ва Вазорати маориф ва илми Ҷумҳурии Тоҷикистон вохўрии устодон ва донишҷўёни Донишкада бо нозири шуъбаи муқовимат бо коррупсияи Раёсати Агентӣ дар вилояти Суғд, капитани адлия Нуриддинзода Комрон Қутбиддин баргузор гардид.
Вохўриро муовини директор оид ба тарбия ва рушди ҷавонон, номзади илмҳои филологӣ, дотсент Аҳророва Гулчеҳра Усмоновна оғоз бахшида, аз зарурияти пешгирии коррупсия ва муқовимат бар он ёдовар шуд. Сипас, нозири шуъбаи муқовимат бо коррупсияи Раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар вилояти Суғд, капитани адлия Нуриддинзода Комрон Қутбиддин бо маърўзаи пурмуҳтаво баромад намуд. Аз ҷумла таъкид гардид, ки дар самти пешгирию муқовимат ба коррупсия як қатор санадҳои меъёрӣ-ҳуқуқии байналмилалию миллӣ қабул ва мавриди амал қарор дода шудаанд.
Инчунин бо Фармони Президенти Ҷумҳурии Тоҷикистон аз 10 январи соли 2007, №143 мақомоти махсуси муборизабаранда бо коррупсия-Агентии назорати давлатии молиявӣ ва мубориза бо коррупсияи Ҷумҳурии Тоҷикистон таъсис дода шуд. Тибқи муқаррароти моддаи 1 Қонуни Ҷумҳурии Тоҷикистон «Дар бораи Агентии назорати давлатии молиявӣ ва мубориза бо коррупсияи Ҷумҳурии Тоҷикистон» Агентии мазкур мақомоти ваколатдори назорати давлатии молиявӣ ва ҳифзи ҳуқуқ буда, назорати давлатии молиявиро оид ба истифодаи самарабахши маблағҳои давлатӣ ва молу мулки давлатӣ барои таъмини амнияти иқтисодии давлат, бо роҳи огоҳсозӣ, пешгирӣ, ошкорсозӣ, рафъи ҳуқуқвайронкуниҳои коррупсионӣ, фошнамоӣ, таҳқиқ ва тафтишоти пешакии ҷиноятҳои коррупсионӣ, иқтисодии хусусияти коррупсионидошта ва ҷиноятҳои ба андоз алоқаманд, инчунин дигар вазифаҳоеро, ки ҳамин Қонун ва дигар санадҳои меъёрии ҳуқуқии Ҷумҳурии Тоҷикистон пешбинӣ кардаанд, иҷро менамояд.
Нуриддинзода Комрон Қутбиддин дар идомаи суханронии худ аз мафҳуми коррупсия ёдовар шуда, таъкид намуд, ки тибқи моддаи 1 Қонуни Ҷумҳурии Тоҷикистон «Дар бораи муқовимат ба коррупсия» коррупсия – кирдоре (ҳаракат ё беҳаракатие), ки аз ҷониби шахси барои иҷрои вазифаҳои давлатӣ ваколатдор ё шахсони ба он баробаркардашуда бо истифода аз мақоми хизматии худ ва имкониятҳои он барои ба манфиати худ ё шахси дигар ғайриқонунӣ ба даст овардани неъматҳои моддию ғайримоддӣ, бартарӣ ё имтиёзҳои дигар содир карда мешавад, инчунин ба ин шахс бевосита ё бавосита додани неъматҳои моддию ғайримоддӣ, бартарӣ ё имтиёзҳои дигар ба субъектҳои ҳуқуқвайронкуниҳои ба коррупсия алоқаманд бо мақсади моил кардан ё мукофотонидани онҳо барои содир намудани чунин ҳаракатҳо ба манфиати шахси воқеӣ ё ҳуқуқӣ мебошад.
Инчунин тибқи моддаи 7 ҳамин Қонун субъектҳои муқовимат ба коррупсия аз субъектҳои бевосита ба коррупсия муқовиматкунанда ва субъектҳое, ки дар муқовимат ба коррупсия иштирок менамоянд, иборат мебошанд. Шахсони воқеӣ ва ҳуқуқӣ низ, ҳамчун иштироккунандаи муқовимат ба коррупсия дар пешгирию амалишавии барномаҳои давлатии зиддикоррупсионӣ саҳм мегузоранд.
Мавсуф, дар идомаи баромади худ аз ҷиноятҳои хусусияти коррупсионидошта, ки дар кодекси ҷиноятии Ҷумҳурии Тоҷикистон пешбинӣ шудаанд, маълумоти муфассал дод.
Нуриддинзода Комрон Қутбиддин дар интиҳои баромади худ аз ҳозирин даъват ба амал овард, ки дар самти муқовимат ба коррупсия саҳмгузор бошанд ва барои пешрафти Тоҷикистони азиз, ҳиссаи арзандаи худро гузоранд.