Директори Донишкадаи иқтисод ва савдои Донишгоҳи давлатии тиҷорати Тоҷикистон дар ш. Хуҷанд

Ҳошимзода Ҳомид Ҳасан

Ҳошимзода Ҳомид Ҳасан 12 ноябри соли 1980 дар ҷамоати Хистеварзи ноҳияи Бобоҷон Ғафурови вилояти Суғд дар оилаи коргар ба дунё омадааст. Соли 1987 ба мактаби таҳсилоти умумии рақами 40-и ноҳияи Б. Ғафуров қабул шуда, онро соли 1997 бо баҳои аъло ва ахлоқи намунавӣ хатм кардааст.

Соли 1997 бо роҳхати директори мактаби таҳсилоти умумии рақами 40, ҳамчун толибилми фаъол ва аълохон ба Комплекси ягонаи таълимии Донишгоҳи давлатии тиҷорати Тоҷикистон аз рӯи ихтисоси «Фаъолияти гумрукӣ» дохил шуда, соли 2002 Донишгоҳи мазкурро бо муваффақият ҳамчун мутахассис бо дипломи аъло аз рӯи ихтисоси «Менеҷери фаъолияти гумрукӣ» хатм намудааст.

Фаъолияти меҳнатиро соли 2004 баъди хатми Донишгоҳ дар вазифаи ассистенти кафедраи тиҷорат ва ҳуқуқ оғоз намудааст. Баъдан дар  вазифаҳои гуногун, аз ҷумла, солҳои 2008-2009 ҷонишини мудири шуъбаи таълим, солҳои 2009-2015 ёвари директор, 2015-2018 муовини директор оид ба таълим ва 2018-2020 дотсенти кафедраи молшиносӣ ва фаъолияти гумрукии Муассисаи давлатии таълимии Донишкадаи иқтисод ва савдои Донишгоҳи давлатии тиҷорати Тоҷикистон дар шаҳри Хуҷанд кор кардааст. Дар давраи фаъолият ба унвони номзади илмҳои иқтисод, дотсент, Аълочии маориф ва илми Ҷумҳурии Тоҷикистон ва Ифтихорномаҳои соҳавӣ ҷиҳати татбиқи нишондоду ҳидоятҳои Асосгузори сулҳу Ваҳдати миллӣ – Пешвои миллат, Президенти мамлакат муҳтарам Эмомалӣ Раҳмон ва Ҳукумати Ҷумҳурии Тоҷикистон ва дастуру супоришҳои Раиси вилоят дар соҳаи маориф, тарғиби арзишҳои волои маънавӣ, дар руҳияи ватандӯстӣ, хештаншиносӣ, меҳанпарастӣ тарбия намудани муҳассилини донишгоҳ қадршиносӣ шудааст.

Айни ҳол вазифаи директори Муассисаи давлатии таълимии Донишкадаи иқтисод ва савдои Донишгоҳи давлатии тиҷорати Тоҷикистон дар шаҳри Хуҷандро ба ӯҳда дорад.