Category: Хабарҳо

Mar 17

ДАРАХТИ ДЎСТӢ БИНШИН, КИ КОМИ ДИЛ БА БОР ОРАД…

Ҳамаи мо хуб огоҳ ҳастем, ки санаи 13- уми марти соли 2025 сафари давлатии Президенти Ҷумҳурии Тоҷикистон муҳтарам Эмомалӣ Раҳмон ба Ҷумҳурии Қирғизистон сурат гирифт. Дар ҷараёни сафари давлатӣ мулоқоти сарварони ду кишвари ҳамсоя дар сатҳи баланд гузашт ва чандин санадҳои нави ҳамкории байнидавлатӣ ба имзо расиданд.
Сарҳади давлатӣ миёни Ҷумҳурии Тоҷикистон ва Ҷумҳурии Қирғизистон яке аз масъалаҳои муҳимми муносибатҳои дуҷониба маҳсуб мешуд. Аз замони истиқлолият, ҷонибҳо барои муайянсозӣ ва аломатгузории сарҳади давлатӣ кўшиш намуда, дар ин раванд санадҳои гуногуни ҳуқуқӣ ба имзо расониданд. Муайянсозии хатти марзӣ миёни Тоҷикистон ва Қирғизистон раванди душвор ва мураккаб буда, он аз таърих, тақсимоти замин дар даврони Шўравӣ ва манфиатҳои миллӣ ибтидо гирифтааст. Солҳои охир, муколамаи сиёсӣ ва дипломатӣ байни ду кишвар барои ҳалли мушкилоти марзӣ шиддат гирифт, ки боиси таҳияи якчанд созишномаҳо гардид. Хушбахтона, ақли солим пирўз гардид, комиссияи байниҳукуматӣ фаъолияти хешро дар сатҳи баланд ба роҳ монда, ба ҳадафи ниҳоии худ, яъне муайянсозии хатти марз расид ва он бо имзои Сарварони кишварҳои Тоҷикистону Қирғизистон тасдиқ гардид.
Мо дар замоне зиндагӣ мекунем, ки ҷаҳон шоҳиди дигаргуниҳои зиёде гашта истодааст. Авзои тағирёбандаи ҷаҳон моро водор менамояд, ки ҳушёру зирак бошем ва фирефтаи афкори бадхоҳон нагардем ва дар муҳити дўстию рафоқат ва бародарӣ кору зиндагӣ намоем.
Фаромўш набояд кард, ки ҷомеаи кунунии мо аз ҳарвакта дида бештар ба рафоқату ҳамдилӣ ниёз дорад. Дўстӣ бо мардуми олам танҳо саодату хушбахтӣ меорад. Аз ин хотир шинонидани дарахти дўстӣ савоб буда, решакан кардани ниҳоли душманӣ хуб аст.
Аз давраи Иттиҳоди Шўравӣ то инҷониб дар сарҳади ин ду кишвар нофаҳмиҳо барои замин ва об шуда мегузаштанд. Бо ташаббуси Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Қирғизистон муҳтарам Садир Жапаров санади таърихӣ “Созишнома оид ба сарҳади давлатӣ” имзо гардид, ки имконият дод то баҳсҳои сарҳадӣ аз байн раванд.
Воқеан, сафари давлатии Президенти Ҷумҳурии Тоҷикистон муҳтарам Эмомалӣ Раҳмон ба Ҷумҳурии Қирғизистон як руйдоди муҳими таърихӣ мебошад, ки асосан ба ҳалли се масъалаи муҳим: масъалаи сарҳади давлатӣ, ба роҳ мондани фаъолияти пурраи ду гузаргоҳҳои сарҳадӣ ва барқарорсозии хатсайри мустақими парвоз миёни шаҳрҳои Душанбе ва Бишкекро ҳаллу фасл намуд.

             

Бо боварии комил метавон гуфт, ки ба имзо расидани созишномаи марзӣ, ифтитоҳи сарҳад байни Тоҷикистону Қирғизистон на танҳо як қадами муҳимми сиёсӣ, балки оғози марҳилаи нави ҳамгироӣ ва эътимоди мутақобила мебошад. Сиёсати дурбинонаи Пешвои муаззами миллат муҳтарам Эмомалӣ Раҳмон бори дигар собит намуд, ки Тоҷикистон ҷонибдори ҳамкории устувор ва рушди минтақавӣ мебошад. Мо бо ояндаи неки муносибатҳои ҳасанаи кишварҳои Осиёи Марказӣ боварии комил дорем, бо ҳамкории судманд, ҳусни ҳамсоядорӣ ва дўстию рафоқат метавонем ҳама гуна ихтилофу нофаҳмиҳоро ҳаллу фасл намоем.

Н.РАҶАБЗОД,
устоди ДИС ДДТТ

Mar 05

НАҚШ ВА МАҚОМИ ЗАНОН ДАР ҶОМЕАИ ТОҶИКИСТОН

Занону модарони мо ҳанӯз дар оғози даврони Истиқлоли давлатӣ ба хотири ҳифзи ҳуқуқу озодиҳои худ ва ба эътидол овардани вазъи кишвар азму талош карда, дар роҳи расидан ба сулҳу субот ва Ваҳдати миллӣ саҳми арзишманд гузоштанд.

Эмомалӣ Раҳмон

      Дар таъриху фарҳанги халқи тоҷик иззату эҳтироми зан – модар ҳамеша ҷойгоҳи махсусро дорад. Зеро, зан- модар аввалин мураббии инсон аст ва тарбияи ҳар як шахс аз домони поки ӯ оғоз мешавад. Зан ҳамчун модар тамоми хислатҳои неки инсониро ба кӯдак ба таври табиӣ интиқол медиҳад ва ҳар рафтору ахлоқи модар ба ақлу хислати фарзанд таъсири бевосита мегузорад. Аз ин ҷост, ки агар зан – модар бомаърифату босавод гардад, давлату миллат ҳам ботаълиму ботарбия мегардад. Бинобар ин, ба ҷо овардани иззату эҳтиром нисбати модарону занон ва бонувону духтарон, вазифаи мардону писарон ба шумор меравад.
Ба шарофати Истиқлоли давлатӣ ва бо дастгириҳои бевоситаи Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон мақоми занону бонувон дар ҷомеа баланд гашта, фаъолияти онҳо дар вазифаҳои роҳбарии шохаҳои гуногуни ҳокимияти давлатӣ, дигар соҳаҳои иҷтимоӣ ва иқтисодӣ, корхонаҳои давлатӣ ва бахши хусусӣ бамаротиб афзоиш ёфт.
Тибқи маълумоти оморӣ 49,3 фоизи аҳолии кишварро занон ташкил медиҳанд ва имрӯз дар кишвар соҳае нест, ки занону бонувон дар он фаъолияти пурсамар надошта бошанд .
Занону духтарони лаёқатманд ва кордону ташаббускор ба хизмати давлатӣ ва идоракунии давлатӣ торафт бештар ҷалб гардида истодаанд. Инчунин,саҳми занону духтарон дар рушди соҳаҳои илму маориф, фарҳанг, тандурустӣ ва дигар самтҳои ҳаёти иҷтимоиву иқтисодии кишвар торафт афзун шуда истодааст.
Ҳоло дар кишвар 25 фоизи хизматчиёни давлатӣ, 73 фоизи кормандони соҳаи маориф, 71 фоизи кормандони соҳаи тиб, 47 фоизи кормандони соҳаи фарҳанг, 37 фоизи олимон ва 30 фоизи соҳибкоронро бонувону занон ташкил медиҳанд. Имрӯз беш аз 110 ҳазор бонувону занони кишвар ба фаъолияти соҳибкорӣ машғул мебошанд.
Дар замони соҳибистиқлолӣ зиёда аз 280 ҳазор нафар духтарон муассисаҳои таҳсилоти олиро хатм кардаанд, яъне соҳиби маълумоти олӣ гардидаанд. Аз оғози ҷорӣ гардидани квотаи президентӣ, яъне дар 28 соли охир 11 ҳазору 600 нафар духтарон муассисаҳои таҳсилоти олиро бо квотаи президентӣ хатм кардаанд. Илова бар ин, зиёда аз 35 ҳазор духтарону бонувон муассисаҳои таҳсилоти олии кишварҳои хориҷиро хатм карда, соҳибмаълумот шудаанд. Ҳоло аз 214 ҳазор нафар донишҷӯёни муассисаҳои таҳсилоти олии касбии кишвар 90 ҳазор нафар ё 42 фоизро духтарон ташкил медиҳанд.
Ҷумҳурии Тоҷикистон баъди расидан ба Истиқлоли давлатӣ ба гирдоби ҷанги таҳмилии шаҳрвандӣ афтод. Дар он айёми бисёр мудҳишу вазнин, ки фаъолияти сохтору мақомотҳои давлатӣ пурра фалаҷ гардида буданд, занону модарони тоҷик барои ба эътидол овардани вазъи кишвар азму талош варзида, дар роҳи расидан ба сулҳу субот ва ваҳдати миллӣ саҳми арзандаи худро гузоштанд. Айни ҳол, ҳазорҳо нафар занону бонувони қавиирода ва ҷасуру далери кишвари мо дар сафи Қувваҳои Мусаллаҳ ва мақомоти ҳифзи ҳуқуқ хизмати Модар – Ватанро адо карда, дар ҳифзи марзу буми кишвар ва тартиботу оромии ҷомеа баробари мардон адои вазифа карда истодаанд.
Ҳукумати кишвар, барои дастгирӣ ва ҳалли мушкилоти занону бонувон тамоми тадбирҳои заруриро амалӣ карда истодааст. Ҳоло дар ин самт якчанд стратегияву консепсия ва барномаҳои давлатӣ қабул гаштаанд. Пеш аз ҳама, Конститутсияи Ҷумҳурии Тоҷикистон аз 6 ноябри соли 1994, ки баробарии ҳуқуқу озодиҳои мардону занонро кафолат медиҳад ва баробари ин, як қатор барномаҳои давлатӣ ва стратегияҳо миллӣ ,аз ҷумла “Барномаи давлатии тарбия, интихоб ва ҷобаҷогузории кадрҳои роҳбарикунанда аз ҳисоби занону бонувони болаёқат барои солҳои 2017–2022” ва қабули барномаи нави мазкур барои солҳои 2023-2030, “Стратегияи миллии фаъолгардонии нақши занон дар Ҷумҳурии Тоҷикистон барои солҳои 2011–2020” ва нақшаи амалисозии он барои солҳои 2015–2020 ва қабули Стратегияи нави мазкур барои солҳои 2021 – 2030 ва нақшаи амалисозии он барои солҳои 2021 – 2025 таҳия ва ба тасвиб расонида, давра ба давра амали шуда истодаанд.
Бо мақсади ҳифз ва таъмини ҳуқуқу манфиатҳои занону оила ва барои кӯмаки ҳамаҷониба дар баланд бардоштани мақоми занон дар ҷомеа Кумитаи кор бо занон ва оилаи назди Ҳукумати Ҷумҳурии Тоҷикистон таъсис дода шуд. Дар баробари ин, дар кишвари мо, дигар санадҳои ҳуққуқӣ ва барномаҳои давлатӣ қабул шуданд, ки барои баланд бардоштани мақоми занон дар ҷомеа кафолат медиҳанд.
Ҷумҳурии Тоҷикистон бо Созмони Миллали Муттаҳид ҳамкории судманд менамояд ва Конвенсияи ин Созмонро дар бораи барњам додани тамоми шаклњои табъиз нисбати занон, Эъломияи умумии ҳуқуқи башар ва дигар конвенсияҳои байналмилалӣ оид ба муњофизати њуќуќи инсон, занон ва кӯдакон пурра дастгирӣ менамояд.
Кишвари мо, ҳамчунин бо Иттиҳоди Аврупо, Созмони амният ва ҳамкорӣ дар Аврупо ва бо сохторҳои минтақавӣ Иттиҳоди Давлатҳои Мустақил ва Созмони ҳамкории Шанхай нисбат ба масъалаҳои гендерӣ ва баланд бардоштани мақоми занон дар ҷомеа ҳамкорӣ менамояд.
Занону духтарони ҳунарманди тоҷик ғайр аз кору фаъолияти пурсамар дар соҳаҳои мухталифи кишвар дар озмунҳои минтақавӣ ва байналмилалӣ низ иштирок карда, соҳиби ҷоизаву ҷойҳои ифтихорӣ гардида истодаанд. Дар ин росто, онҳо имрӯз эҳёкунандаву нигоҳдоранда ва тарғибкунандаву посдорандаи фарҳангу таърих ва анъанаҳои миллии халқи тоҷик мебошанд. Маҳсули эҷоди бонувони ҳунарманд ва чеварону заргарони тоҷик дар якчанд намоишгоҳҳои сатҳи минтақавию ҷаҳонӣ гузошта шуда, маҳорату истеъдоди занону бонувони моҳири тоҷик баҳои баланд гирифт.
Ҳамин тариқ, маҳз ба шарофати Истиқлоли давлатӣ ва дастгириҳои ҳамаҷонибаи Президенти кишвар муҳтарам Эмомалӣ Раҳмон, мақоми занону бонувон дар тамоми соҳаҳои ҳаёти ҷомеа боз ҳам баланд гашт ва вазъи иҷтимоии онҳо беҳтар шуд. Кишвари мо, минбаъд ташаббусҳои занону бонувонро ҳамаҷониба дастгирӣ карда, барои баланд бардоштани мақом ва сатҳи маърифати онҳо, аз ҷумла омӯзонидани илму дониш, касбу ҳунар ва муҳайё кардани ҷойҳои корӣ ҳамаи тадбирҳои заруриро меандешад. Вобаста ба ин, занону бонувон ҳунару истеъдод, кӯшишу ғайрат, қобилияти ташкилӣ ва маҳорату кордонии худ худро ҷиҳати татбиқи сиёсати давлатӣ ва пешрафту ободии ҷомеа равона намоянд. Зеро, саҳми онҳо дар рушду инкишофи давлат ва ҳалли масъалаҳои муҳими ҷомеа бузург арзёбӣ мегардад.

Ҳошимов Фирӯз Ҷабборович,
муаллими калони кафедраи
ҷомеашиносии ДИС ДДТТ
дар ш.Хуҷанд

Jan 23

ДИҚҚАТ, ЭЪЛОН!!! ОЗМУНИ ҶУМҲУРИЯВИИ «МАГИСТРАНТИ СОЛ» ДАР СОЛИ 2025

Вазорати маориф ва илми Ҷумҳурии Тоҷикистон ба маълумот мерасонад, ки барои дарёфти ҷоизаи Озмуни ҷумҳуриявии «Магистранти сол» миёни магистрантони муассисаҳои таҳсилоти олии касбӣ ва илмии Ҷумҳурии Тоҷикистон» дар соли 2025 Озмун эълон менамояд.

     Озмун бо мақсади ба ҳам овардани магистрантон, дарёфти ҷеҳраҳои нави лаёқатманд, соҳибмаърифат ва ташаббускор, роҳ надодан ба ҳар гуна ақидаҳои ифротӣ ва омилҳои номатлуб, ки ба зеҳни магистрантон таъсири манфӣ доранд, ташаккули афкори солим, ғанӣ гардонидани сатҳи ҷаҳонбинӣ ва маърифатнокӣ, ҳимояи арзишҳои миллӣ ва таҳкими эҳсоси худшиносию меҳанпарастӣ, эҳсоси масъулияти шаҳрвандӣ ва таҳкими зеҳни миллии ҷавонон, равона намудани онҳо ба илмомӯзӣ, бедор намудани завқи китобхонӣ ва илмдӯстӣ, тақвияти ҷаҳони маънавӣ, ахлоқӣ ва ҳозирҷавобӣ, инкишофи қобилияти эҷодӣ, таҳкими захираи луғавӣ, фаъолгардонии раванди забондонӣ, беҳтар намудани раванди таълим, такмили фаъолияти таълимии магистрантон, инкишофи қобилияти эҷодӣ, иштироки фаъолонаи онҳо дар ҳаёти илмӣ, сиёсӣ ва ҷамъиятӣ гузаронида мешавад.
    Тибқи талаботи банди 1.5. Низомнома, Озмун барои дарёфти ҷоизаи «Магистранти сол» ҳамасола дар давраҳои зерин баргузор карда мешавад:
       – даври якум – муассисавӣ, нимаи дуюми моҳи феврал – дар муассисае, ки довталаб дар он ҷо таҳсил мекунад;
Муҳлати пешниҳоди ҳуҷҷатҳои ғолибони даври якум барои иштирок дар даври дуюм ба Комиссияи озмуни ҷумҳуриявӣ (вазоратӣ) то якуми моҳи март муқаррар карда шудааст.
    – даври дуюм – ҷумҳуриявӣ (вазоратӣ) моҳи март дар Вазорати маориф ва илми Ҷумҳурии Тоҷикистон баргузор карда мешавад;
      Тибқи талаботи банди 1.4 Низомномаи Озмуни мазкур магистрантони муассисаҳои таҳсилоти олии касбӣ ва илмии ҷумҳурӣ новобаста аз шакли моликият ва тобеияти идоравӣ метавонанд иштирок намоянд.
Бинобар ин довталабон метавонанд тибқи тартиботи муқарраргардида бевосита дар Озмуни мазкур иштирок намоянд.
Масъули баргузории Озмун дар Вазорати маориф ва илми Ҷумҳурии Тоҷикистон раёсати илм ва инноватсия мебошад.
      Телефон барои тамос бо Кумитаи тадорукоти озмун 227-32-59
Барои дастрас намудани Низомномаи озмуни ҷумҳуриявии «Магистранти сол» ба пайванди зер ворид шавед ⤵️⤵️⤵️
https://t.me/vazoratimaorif/4481
Nov 29

ТАШКИЛИ ЭКСКУРСИЯИ ШИНОСОӢ ДАР ҶДММ “ҶАДИД”

    Санаи 28 ноябри соли 2024 мувофиқи нақша чорабиноҳои шуъбаи таҳсилоти дуалӣ ва алоқа бо истеҳсолот, инчунин ба роҳ мондани таҳсилоти дуалии фанҳои марбутаи кафедраи менеҷмент ва маркетинг, донишҷӯёни курси 4-уми ихтисосҳои менеҷмент ва идораи давлатии факултети тиҷорат, фаъолияти гумрукӣ ва ҳуқуқ бо ҳамроҳии устодон ба ҶДММ “Ҷадид” барои шиносоӣ бо фаъолияти истеҳсолии ширкати мазкур ташриф оварданд.

Донишҷӯён ва устодонро директори молиявии ширкат Афзалхон Азаматов ва менеҷер оид ба истеҳсолот Латипова Шаҳло бо таърихи таъсисёбӣ, самтҳои фаъолияти ширкат ва сехҳои истеҳсолӣ шинос намуданд.
Ширкати номбурда санаи 9 сентябри соли 2024 аз ҷониби Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба истифода дода шудааст. Ширкати мазкурро соҳибкори ватанӣ Исоматдинов Саидамон Афзалович роҳбарӣ мекунад, он ба гуруҳи корхонаҳои истеҳсолии саноати сабук ва коркарди ашёи хоми маҳаллӣ машғул мебошад, ширкат бо духтани либосҳои гуногун ва содироти он ба кишварҳои дуру наздик машғул аст.
Мақсад аз ташрифи донишҷӯён ба ширкати мазкур омӯзиши ҷараёни истеҳсоли маҳсулот, фаъолияти тиҷоратӣ ва ташкили менеҷмент мебошад.

Nov 28

Ҷамбасти Спартакиада дар ДИС ДДТТ!

Бахшида ба Рӯзи Парчами давлатӣ дар ДИС ДДТТ спартакиадаи омӯзгорон баргузор гардид. Дар чорабинии мазкур мусобиқаҳои варзишӣ оид ба шашка, шоҳмот ва тенниси рӯи миз гузаронида шуданд.

   Дар спартакиада Инъомхӯҷа Бузруков-раиси иттифоқи касабаи кормандони соҳаи савдо, кооператсияи матлубот ва корхонаҳои хусусии вилояти Суғд, Хайруллохон Ҷамолов – раиси кумитаи иттифоқи касабаи муассисаҳои давлатӣ, Фарҳод Холмирзоев – муовини раиси иттифоқи касабаи кормандони соҳаи савдо, кооператсияи матлубот ва корхонаҳои хусусии вилояти Суғд иштирок намуда, рафти баргузории мусобиқаҳои варзиширо назорат намуданд. Дар натиҷа аз рӯи намуди шашка ғолибият насиби Нигина Муъминова, Матлуба Холназарова ва Адиба Ахмедова гардид. Дар намуди шоҳмот пирӯзӣ насиби Усмон Ҷабборов, Акбарҷон Аҳроров ва Муқаддас Набиева гашт. Дар мусобиқаи тенниси рӯи миз Садриддин Ғозибеков, Акмал Пӯлотов ва Саодат Аминҷонова пирӯз гардиданд. Дар поёни чорабинӣ дар вазъияти тантанавӣ ба ғолибон диплом, медал, сипоснома ва туҳфаҳои хотиравӣ супорида шуд.

Nov 21

Дар ДИС ДДТТ оид ба пешгирии ҷиноятҳои муташаккил, нагаравидан ба сафи ҳизбу созмонҳои ифротӣ ва мубориза алайҳи терроризму экстремизм бо иштироки намояндагони мақомоти қудратӣ мулоқот судманд баргузор гардид.

Дар ДИС ДДТТ оид ба пешгирии ҷиноятҳои муташаккил, нагаравидан ба сафи ҳизбу созмонҳои ифротӣ ва мубориза алайҳи терроризму экстремизм бо иштироки намояндагони мақомоти қудратӣ мулоқот судманд баргузор гардид. Чорабиниро муовини директор оид ба тарбия ва рушди ҷавонон, н.и.ф., дотсент Аҳрорӣ Гулчеҳрахон Усмонзода ҳусни ифтитоҳ бахшида, меҳмонон: сардори шуъбачаи шуъбаи мубориза бар зидди ҷиноятҳои муташаккили ВКД ҶТ дар вилояти Суғд подполковники милитсия Ҳайдарзода Ҷамшед Алиҷон ва корманди шуъбачаи шуъбаи мубориза бар зидди ҷиноятҳои муташаккили ВКД ҶТ дар вилояти Суғд Ҳусейнзода Беҳрӯзро муаррифӣ намуд. Сардори шуъбачаи шуъбаи мубориза бар зидди ҷиноятҳои муташаккили ВКД ҶТ дар вилояти Суғд подполковники милитсия Ҳайдарзода Ҷамшед Алиҷон дар ҳузури донишҷӯён дар бораи гиромӣ доштани Истиқлолу Ваҳдати миллӣ, даст назадан ба ҷиноятҳои муташаккил, ҳушёру зиракии сиёсиро аз даст надодан ва нагаравидан ба созмону гуруҳҳои ифротӣ ибрози андеша намуд. Солҳои охир ҷаҳон шоҳиди воқеаҳои даҳшатбор гашта, ҷангу ҷидоли абарқудратҳо моро ҳушдор медиҳанд, ки пеш аз ҳама бо шукронаи сулҳу осоиштагии кишвари азизамон ҳушёру зирак бошем, ба ҳизбу ҳаракатҳои ифротӣ ҳамроҳ нагардем. Ҷавонон бояд тарғибгари дастовардҳои соҳибистиқлолии Тоҷикистони азиз бошанд ва бо таҳсили намунавӣ ва ахлоқи ҳамида мутахассиси варзида гашта, барои ободию ояндаи дурахшони кишвар хидмат намоянд. Сипас байни донишҷӯён ва меҳмонон оид ба масъалаҳои матраҳгашта саволу ҷавоб ва мубодилаи афкор сурат гирифт.
Nov 18

ЭЪЛОН!!!

Шуъбаи таҳсилоти дуалӣ ва алоқа бо истеҳсолоти Донишкадаи Иқтисод ва Савдои Донишгоҳи Давлатии Тиҷорати Тоҷикистон, дар ҳамкорӣ бо ҶСК “Тавҳидбонк”, шартномаи сеҷониба бо донишҷӯён имзо мерасонад. Ин иқдом ба донишҷӯён имкон медиҳад, ки дар муҳити воқеии корӣ малакаҳои касбии худро такмил диҳанд ва ҳамзамон донишҳои таҷрибавии худро густариш диҳанд. Донишҷӯён дар вақти берун аз машғулиятҳои таълимӣ ба кор дар ҶСК “Тавҳидбонк” ҷалб мешаванд.

Пас аз гузаронидани санҷишҳои зарурӣ, донишҷӯён бо ҷойи корӣ дар ин ташкилот таъмин карда мешаванд.

Инчунин, “Тавҳидбонк” бар ивази фаъолияти донишҷӯён маблағи таҳсили онҳоро пардохт менамояд.

Шумораи ҷойҳои корӣ маҳдуд аст, бинобар ин довталабон бояд аз санҷишҳои зарурӣ гузаранд.

Афзалиятҳои ин иқдом:

  • Имконияти кор ва таҳсил дар як вақт.
  • Такмили малакаҳои касбӣ дар муҳити воқеии корӣ.
  • Ҷои кори доимӣ пас аз хатм.

Барои  бақайдгирӣ:
Ба Шуъбаи таҳсилоти дуалӣ ва алоқа бо истеҳсолот муроҷиат кунед (бинои таълимии №2, утоқи 314) ё тариқи почтаи электронии dual.edu.iet@gmail.com. Муроҷиат намоед.

Фурсатро аз даст надиҳед ва барои ояндаи касбии худ қадами устувор гузоред!

Nov 16

Табрикоти директори Донишкадаи иқтисод ва савдои ДДТТ, номзади илмҳои иқтисод, дотсент Ҷалилзода А. А. ба муносибати Рўзи Президенти Ҷумҳурии Тоҷикистон ва 32-солагии баргузории Иҷлосияи 16-уми Шўрои Олии Ҷумҳурии Тоҷикистон.

     Бо камоли эҳтиром ва самимияти афзун, дар ин рўзҳои хуҷаставу фархунда, Рўзи Президенти Ҷумҳурии Тоҷикистон ва 32-солагии Иҷлосияи 16-уми Шўрои Олии Ҷумҳурии Тоҷикистонро ба Шумо аҳли ҷомеаи меҳнатии Донишкада, ҳайати профессорону устодон ва донишҷўёну кормандон самимона табрику таҳният гуфта, бароятон саодати рўзгор, сарбаландию сарфарозӣ ва барору комёбиҳо таманно менамоям. Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар нахустин баромади худ баъди интихоб гардиданашон ба вазифаи Президенти Ҷумҳурии Тоҷикистон зимни суханрониашон дар Маҷлиси Олии Ҷумҳурии Тоҷикистон тазаккур доданд, ки: “Президенти Ҷумҳурии Тоҷикистон кафили амалӣ гардидани Конститутсия мебошад. Ман ба ҳайси Президент Шуморо бовар мекунонам, ки ҳифзи ҳуқуқҳо, озодиҳои шаҳрвандон, тамомияти арзии ҷумҳурӣ, Ваҳдати миллӣ, сулҳу салоҳро дар ҷумҳурӣ таъмин хоҳам кард”. Дастоварду комёбиҳои беназири даврони соҳибистиқлолӣ далолат ба хидматҳои бузургу арзишманди Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон менамоянд. Сарвари давлат дар як мудддати кўтоҳ тавонистанд Тоҷикистонро дар арсаи байналмилалӣ муаррифӣ намуда, барои халқи тоҷик шароити зиндагии шоиставу арзанда муҳайё созанд. Иҷлосияи ХVI Шўрои Олӣ барои мо як мактаби бузурги ҳаёт ва сабақи нотакрори давлату давлатдорӣ, марҳалаи ибратомўзи расидан ба сулҳу ваҳдати миллӣ, як қадами ҷиддии рў овардан ба нақшаҳои азими офарандагӣ гардид. Пешвои муаззами миллат барҳа фармудаанд: “Иҷлосияи XVI Шӯрои Олии Тоҷикистон рӯйдоди воеан таърихӣ мебошад, зеро маҳз дар ҳамин Иҷлосия тадири ояндаи давлати миллии тоҷикон тарҳрезӣ гардид ва ба сӯи ҳадафҳои бузурги умумимиллӣ – сулҳу субот ва ваҳдати миллӣ адами нахустин гузошта шуд”. Аҳли ҷомеаи меҳнатӣ, ҳайати профессорон, омўзгорон, донишҷўён ва кормандони Донишкада, бо истифода аз фурсати муносиб, ҳамаи Шумо ва сокинони сарбаланди Ватани азизамонро ба ҷашни фархундаи Рўзи Президенти Ҷумҳурии Тоҷикистон ва Иҷлосияи 16-уми Шўрои Олии Ҷумҳурии Тоҷикистон табрику таҳният гуфта, таманнои онро дорам, ки дар кишвари азизамон сулҳу субот, оромӣ ва Ваҳдати миллӣ абадан пойдор монда, ҳар як сокини бо нангу номус бо азму иродаи созанда дар пешрафту шукуфоии он саҳми арзандаи хешро гузорад.

Nov 12

Мизи мудаввар дар мавзуи «Нақши Иҷлосияи XVI Шӯрои Олӣ дар рушду нумуи Ҷумҳурии Тоҷикистон»

Санаи 11 ноябри соли ҷорӣ, бахшида ба 32-юмин солгарди Иҷлосияи XVI Шӯрои Олии Ҷумҳурии Тоҷикистон бо ташаббуси кафедраи иқтисодиёти ҷаҳони ДИСДДТТ мизи мудаввар ташкил ва баргузор гардид.

Мизи мудавваро мудири кафедра н.и.и. Мухитдинова Ш.С. ҳусни оғоз бахшида, ҳамагонро бо ин санаи таърихӣ шодбош намуда, иброз дошт, ки маҳз ҳамин Иҷлосияи тақдирсоз барои мардуми шарифи кишвар сарвари оқилу кордон, матинирода ва марди хоксору ғамхорро барои ҳамчун роҳбари олӣ таъин намуд. Инчунин, бо шарофати ин санаи таърихӣ дар мамлакати ҷангзада сулҳу субот, амнияту осоиштагӣ пойдор гардид.
Сипас, муовини директор оид ба илм ва робитаҳои байналмиллаӣ н.и.и., дотсент Мирпочоев Д.А. оид ба нақши Иҷлосияи XVI Шӯрои Олии Ҷумҳурии Тоҷикистон дар рушди иқтисодиёти кишвар сухан ронданд.
Баъдан, маърузаи мутахассиси шуъбаи иттилоот ва ҷомеа Мамадҷонов Ф.С. дар мавзуи «Нақши Иҷлосияи XVI Шӯрои Олии Ҷумҳурии Тоҷикистон дар таҳкими сулҳу суботи Ҷумҳурии Тоҷикистон» шунида шуд, ки хеле ҷолиби диққат буд. Мамадҷонов Ф.С. ҳамчун як шахсе, ки дар рафти ин Иҷлосияи тақдирсоз ширкат варзида буданд, ба аҳли нишаст бисёр маълумотҳои муҳимро мавриди муҳокима қарор доданд.
Инчунин, донишҷўи курси 3, гуруҳи 25010407 ихтисоси молия ва қарз дар ФИБ Эргашева Нигина дар мавзуи «Аҳамияти иҷтимоии Иҷлосияи XVI Шӯрои Олии Ҷумҳурии Тоҷикистон» бо забони англисӣ баромад намуд.
Мизи мудавар ҷиҳати тарбиявӣ дошт, ки дар охир, донишҷўён доир ба Пешвои миллат, Тоҷикистон, Ватан, Истиқлолият шеърҳо қироат намуданд.
Боиси зикр аст, ки мизи мудаввар хеле хотирмон ва дар сатҳи баланд ташкил ва баргузор гардид.