Category: Хабарҳо

Nov 04

Конститутсия – кафили ҳифзи ҳуқуқ ва озодиҳои инсон ва шаҳрванд

Дар ДИС ДДТТ конференсияи байналмилалии илмӣ-амалӣ бахшида ба 30-юмин солгарди Конститутсияи Ҷумҳурии Тоҷикистон таҳти унвони «Конститутсия – кафили ҳифзи ҳуқуқ ва озодиҳои инсон ва шаҳрванд” баргузор гардид. Конференсия бо сухани ифтитоҳии директори Донишкада, н.и.и., дотсент Ҷалилзода А.А. оғоз гардид, ки мавсуф ҳозирин ва устодону донишҷӯёнро ба муносибати баргузории конференсияи байналмилалӣ ва 30-юмин солгарди Конститутсияи давлатии Ҷумҳурии Тоҷикистон табрику таҳният намуд.

Дар конференсияи байналмилалӣ Мачехин Виктор Александрович, номзади илмҳои ҳуқуқшиносӣ, мудири лабораторияи таҳқиқотҳои сиёсати андози Академияи хоҷагии халқ ва идоракунии давлатии Россия дар мавзӯи “Конститутсия – кафили ҳифзи ҳуқуқ, озодиҳои инсон ва шаҳрванд” баромад намуд. Намояндаи мақомоти иҷроияи ҳокимияти давлатии вилояти Суғд Мирзоғуфрон Ғафурӣ табрикоти Раиси вилоятро ба муносибати 30-юмин солгарди Конститутсияи Ҷумҳурии Тоҷикистон ба самъи ҳозирин расонид.

Дар идомаи конференсия Ғафурӣ Меҳриддин Садриддинзода, номзади илмҳои ҳуқуқшиносӣ, сардори факултети 4-уми Вазорати корҳои дохилӣ, полковники милитсия дар мавзӯи “Моҳият ва таъиноти Конститутсияи Ҷумҳурии Тоҷикистон”, Маҳмудзода Олим Ҳомид, сардори шуъбаи муқовимат бо коррупсияи Раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар вилояти Суғд, подполковники адлия дар мавзӯи “Ислоҳоти асосии сохтори конститутсионӣ дар Ҷумҳурии Тоҷикистон” ва Ҷӯраева Донохон Тӯрахоновна, прокурори

шуъбаи назорати қонунӣ будани санадҳои судӣ бо парвандаҳои ҷиноятӣ, мушовири адлияи дараҷаи дуюм дар мавзӯи “Кафолатҳои конститутсионии ҳууқуқ ва озодиҳои инсон” баромадҳои пурмуҳтаво намуданд.
Ҳамчунин Нигора Ҳоҷибоева, доктори PhD, муаллими калони кафедраи ҳуқуқшиносии ДИС ДДТТ перомуни мавзӯи “Конститутсия – рамзи давлатдории миллӣ” суханронӣ намуд.
Дар фарҷоми ҷаласаи ифтитоҳии конференсияи байналмилалӣ аз тарафи директори Донишкада н.и.и., дотсент Ҷалилзода А.А. ба маърузачиён сипоснома ва туҳфаҳои хотиравӣ тақдим карда шуд.

Конференсия дар бахшҳо идома ёфта, мақолаҳои пешниҳодгардида дар шакли китоби алоҳида ба нашр хоҳад расид.

Oct 29

Конференсияи байналмилалии илмӣ-амалӣ таҳти мавзуи “Муаммоҳои муосири рушди низоми иҷтимоӣ-иқтисодӣ дар шароити ҷаҳонишавӣ”

Санаи 25 октябри соли 2024 бо ташаббуси Шуъбаи илм ва инноватсияи ДИС ДДТТ дар ҳамбастагӣ бо якчанд донишгоҳҳову донишкадаҳои пешқадами ҷаҳон Донишкадаи иқтисодиёт ва идораи Донишгоҳи давлатии миллии тадқиқотии Белгород (Ферератсияи Русия), Донишкадаи инженерӣ-технологии Бухоро (Ҷумҳурии Ӯзбекистон), Донишгоҳи Русия-Арманистон (Славянӣ) (Ҷумҳурии Арманистон), Донишгоҳи Дэчжоу (Ҷумҳурии мардумии Чин), Донишкадаи иқтисодии Академияи миллии илмҳои Беларус (Ҷумҳурии Беларус), Донишгоҳи иқтисодии Казпотребсоюзи Караганда (Ҷумҳурии Қазоқистон), Донишгоҳи нафтии Пекин (Ҷумҳурии мардумии Чин), Донишгоҳи давлатии иқтисодии Тошканд (Ҷумҳурии Ӯзбекистон), Донишгоҳи давлатии Тошканд ба номи С. Улуғзода (Ҷумҳурии Ӯзбекистон), Донишгоҳи хоҷагии халқи Қазоқистон (Ҷумҳурии Қазоқистон), Донишкадаи иқтисод ва савдои ДДТТ (Ҷумҳурии Тоҷикистон)

баргузор гардид. Дар конфронси мазкур аз ҷониби ҳайати профессорону омӯзгорон, магистрантон якчанд мақолаҳои илмӣ пешниҳод карда шуда, мавриди муҳокима гаштанд. Конфронси илмӣ-амалӣ тариқи онлайн гузаронида шуда, иштирокчиёни конфронс дар баҳсҳои илмӣ басо фаъол буданд ва ба саволҳои худ ҷавобҳои саҳеҳро ноил гаштанд. Дар охири ҷамъбасти конфронс аз ҷониби Донишкадаи иқтисодиёт ва идораи Донишгоҳи давлатии миллии тадқиқотии Белгород ба иштирокчиёни конфронс сертификатҳо пешниҳод карда шуданд.

Oct 25

Озмуни вилоятии «Беҳтарин донандаи Конститутсия»

Санаи 18-уми октябри соли 2024 тибқи мактуби Раёсати Донишгоҳи давлатии ҳуқуқ, бизнес ва сиёсати Тоҷикистон бахшида ба ба 30-солагии Конститутсияи Ҷумҳурии Тоҷикистон ва «Соли маърифати ҳуқуқӣ» озмуни вилоятии «Беҳтарин донандаи Конститутсия» баргузор гардид.

Дар озмуни вилоятӣ аз Донишкадаи иқтисод ва савдои Донишгоҳи давлатии тиҷорати Тоҷикистон донишҷўи бахши 4-уми ихтисоси 24010302-танзими ҳуқуқии молия ва қарз Бобоев Дилшод Ҳошимбоевич аз рўи номинатсияи «Беҳтарин донандаи Конститутсия» ва донишҷўи бахши 2-юми ихтисоси 240103-ҳуқуқи иқтисодӣ Хаёлов Шаҳдӣ Мирзоҳакимович аз рўи номинатсияи «Беҳтарин мақола дар бораи Конститутсия» иштирок намуданд. Барои иштироки фаъолона дар баланд бардоштани маърифати ҳуқуқӣ, эҳтироми қонун ва ҳифзи манфиатҳои миллӣ, боло бурдани сатҳи фарҳанги конститутсионӣ ва ташаккули низоми устувори рафтори ҳуқуқӣ дар озмуни вилоятӣ донишҷўи бахши 4-уми ихтисоси 24010302-танзими ҳуқуқии молия ва қарз Бобоев Д.Ҳ. аз рўи номинатсияи «Беҳтарин донандаи Конститутсия» сазовори дипломи дарачаи 3 ва тўҳфаи пулӣ ба миқдори 500 сомонӣ, ва донишҷўи бахши 2-юми ихтисоси 240103-ҳуқуқи иқтисодӣ Хаёлов Ш.М. аз рўи номинатсияи «Беҳтарин мақола дар бораи Конститутсия» сазовори дипломи дараҷаи 2 ва тўҳфаи пулӣ ба миқдорӣ 700 сомонӣ гардиданд.

Oct 24

Маҳфили МУҲОСИБОНИ МУОСИР!

Тибқи нақшаи махфили донишҷуёни кафедраи баҳисобгирии бухгалтерӣ, таҳлил ва аудит таҳти унвони “Муҳосибони муосир” санаи 23.10.2024 махфили навбатӣ бо иштироки донишҷўёни ихтисосҳои 250108-баҳисобгирии бухгалтерӣ, таҳлил ва аудит ва 250111- аудит ва ревизия ташкил ва гузаронида шуд.

Роҳбари махфили кафедра муаллими калон Турсунова М. дар баромади ифтитоҳии худ оиди мақсад ва гузаронидани махфил сухан ронда, баромади аввалро ба донишҷўи курси 3-юми ихтисоси 250108р Турсунова Моҳҷабин бо маърўза дар мавзўи “Инвентаризация – как метод контроля имущества предприятий” доданд.

Инчунин донишчўи курси 4-уми ихтисоси 250108т Убайдов Ғ. дар мавзўи “Истифодабарии СЕРВЕР-и таҳияи ҳисоботи молиявӣ дар корхонаву ташкилотҳо” баромад намуд. Аз тарафи шунавандагон бисёр саволҳои ҷолиб дода шуда, ба он ҷавобҳои мухтасар гирифта шуданд. Маҳфилро мудири кафедра дотсент Зокирхонзода М.З. ҷамъбаст намуда, иброз дошт, мунтазам барои баланд бардоштани сифати низоми таълим ва тайёр намудани муҳосибони баландихтисос гузаронидани чунин махфилҳо хеле муфид аст. Аз ин лиҳоз барои тайёр намудани мутаххасисони баландихтисоси муҳосибӣ ва кадрҳои илмӣ бо мақсади тақвияти иқтидори илмию зеҳнӣ бо усули анъанавию низоми нави бисёри зинагии таълим таваҷҷўҳи махсусе зоҳир гардонида шудааст.

Oct 23

Вохурии кори бо намояндагони ҶДММ “Далерон”

Санаи 21.10.2024 бо иқдоми мудири шуъбаи таҳсилоти дуалӣ ва алоқа бо истеҳсолот досент Буходиров Ҳ.И вохури кори бо намояндагони ҶДММ “Далерон” бо директори ДИС ДДТТ дар шаҳри Хуҷанд, н.и.и Ҷалилзода А.А гузаронида шуд, ки дар он масъалаҳои кори барои тайер кардани мутахассисони ҷавобгуй ба талаботи бозори меҳнат ва бастани шартномаҳои се ҷониба ва дуҷониба дида баромада шуд. Аз ҷониби ҶДММ “Далерон” сардори шуъбаи HR Иноятова Тахмина ва сардори департаменти Маркетинг ва рушд Буходиров Муҳаммадхуҷа оид ба омодагии ҳамкори бо донишкада ва афзалиятҳои ширкати худро баён дошта қайд карданд, ки дар ҶДММ “Далерон” ҳамаи имкониятҳо барои корбарӣ оиди пешниҳодҳои директори донишкада муҳтарам Ҷалилзода А.А мавҷуд мебошад. Дар вохӯрӣ муовини директор оид ба илм ва робитаҳои байналхалқӣ н.и.и Мирпочоев Д. А. иштирок дошта, баъзе фикру андешаҳои худро баён доштанд.

Oct 22

Вохӯри бо Раёсати андози вилояти Суғд

Бо мақсади омода намудани мутаххасисони баландихтисоси муҳосибӣ ва тақвияти иқтидори илмию зеҳнӣ онҳо бо усули анъанавию низоми нави таълим аз тарафи омӯзгорони кафедраи баҳисобгирии бухгалтерӣ, таҳлил ва аудит таваҷҷўҳи махсусе зоҳир гардонида мешавад.

Тибқи нақшаи корхои таълимӣ-методӣ санаи 21.10.2024 бо ташаббуси омўзгорони кафедраи баҳисобгирии бухгалтерӣ, таҳлил ва аудит дотсент Содиқова Г.И. ва муаллими калон Самадова М. аз ҷиҳати алоқаи илм бо истеҳсолот дарси амалӣ дар Раёсати андози вилояти Суғд бо иштироки донишҷўёни курси сеюми ихтисоси 250108 – баҳисобгирии бухгалтерӣ, таҳлил ва аудит гузаронида шуд.
Сармутахассиси раёсат Аҳмадҷонова Р. донишҷуёнро пешвоз гирифта, бо фаъолияти якчанд шуъбаҳои раёсат шинос намуд. Мудири шуъбаи назорат ва кор бо мизоҷон оид ба усулҳои назорат бо истифодаи имкониятҳои рақамикунонӣ донишҷуёнро шинос намуд. Инчунин бо тариқи электронӣ таҳия намудани шаклҳои ҳисобот, тарзи ҳисоб намудани андозҳои пардохтшаванда мутахассисони шуъба маълумоти мухтасар пешниҳод намуданд. Аз тарафи донишчўён низ бисёр саволҳои ҷолиб ба мутахассисон пешкаш шуда, ҷавобҳои мувофиқ гирифта шуданд.

Oct 22

Мақоми муҳосиби муосир дар шароити рақамикунонӣ

Мутобиқи нақшаи корҳои таълимӣ-методӣ санаи 19.10.2024 бо ташаббуси кафедраи баҳисобгирии бухгалтерӣ, таҳлил ва аудит вохўрии донишҷўёни курси якуми ихтисосҳои 250108 таҳлил ва аудит ва 250111 -аудит ва ревизия бо мутахассисони соҳавӣ таҳти унвони:
“Мақоми муҳосиби муосир дар шароити рақамикунонӣ” гузаронида шуд.


Дар сухани ифтитоҳии худ мудири кафедра дотсент Зокирхонзода М.З. оид ба мақсади ташкил ва гузаронидани вохўрии мазкурро шарҳ дода, қайд намуд, ки барои боз ҳам ҳавасманд намудани донишҷўёни курси якуми ихтисосҳои 250108 – баҳисобгирии бухгалтерӣ, таҳлил ва аудит ва 250111 – аудит ва ревизия ба ихтисоси интихоб намудаи худ ин вохўрӣ сабаб шудааст. Зеро дар вохўрӣ муассиси ҶДММ “Суғдполитекс”, сармуҳосиби Идораи муҳосибӣ Раҳмонов Исломҷон Ҳасанович ҳамчун мутахассиси пуртаҷриба оид ба мақоми муҳосиби муосир дар шароити рақамикунонии иқтисодиёт мухтасар баромад намуд ва донишҷўёнро барои бомасъулияту бошавқ хондан даъват намуд. Баромади муҳосиби ҶДММ “Аҷр” Ҳомидов Ассатулло оид ба зарурияти таҷлил барои фаъолияти муҳосибӣ дар шароити муосир бахшида шуда буд.
Чорабинии мазкурро декани факултети молия ва баҳисобгирии бухгалтерӣ дотсент Ҳакимзода М.М. ҷамъбаст карда, барои баргузории чунин чорабинӣ ба меҳмонон ва ташкилкунандагон арзи сипос намуд.
Дар низоми кредитӣ ба масъалаи тайёр намудани мутахассисони баландихтисоси муҳосибӣ ва кадрҳои илмӣ бо мақсади тақвияти иқтидори илмию зеҳнӣ бо усули анъанавию низоми нави бисёр зинагии таълим таваҷҷўҳи махсусе зоҳир гардонида шудааст. Дар охир мудири кафедра ҳозиринро барои иштироки фаъолона сипос гуфта, ба донишҷўён ҳидоят намуданд, ки пешаи роҳи илмро намоянд, зеро ҷавонони заковатманд ояндаи дурахшони миллатанд.

Oct 05

Табрикоти директори ДИС ДДТТ Ҷалилзода А. А. бахшида ба бузургдошти Рўзи омӯзгор

Рўзи якшанбеи ҳафтаи аввали моҳи октябр дар саросари кишвари азизамон чун иди касбии омӯзгорон – Рӯзи муаллим ботантана қайд карда мешавад. Имсол таҷлили ин ҷашни фархунда ба рӯзҳое рост омад, ки тамоми мардуми сарбаланди диёрамон дар рӯҳияи болидаву дили саршори пур аз меҳру муҳаббат ва ифтихор аз Ватану миллат 33-солагии Истиқлоли давлатии Тоҷикистонро ҷашн гирифта, меҳру садоқати бепоёни худро ба халқу Ватан намоиш доданд.

 

Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар суханрониашон барҳақ таъкид доштанд: “Тибқи талаботи Қонуни Ҷумҳурии Тоҷикистон «Дар бораи маориф» шаъну шарафи омӯзгор таҳти кафолат ва муҳофизати қонун қарор дорад. Аз ин рӯ, ҷомеа бояд хуб дарк намояд, ки эҳтиром ба омӯзгор – эҳтиром ба ояндаи миллат аст. Омӯзгор шахсест, ки бо нури саводу маърифат ва илму дониш ҳаёти ҷомеаро равшан месозад, хурофоту ҷаҳолатро аз ҳаёти ҷомеа берун мекунад ва созандагону ободгарони ояндаи Ватанро ба камол мерасонад”.
Бо ин таманниёти нек бори дигар Рўзи омўзгорро бароятон, устодони азиз, табрик гуфта, хоҳони онам, ки ҳамеша сиҳату саломат бошед, комёбиву муваффақиятҳо ёратон бошад ва минбаъд низ дар таълиму тарбия ва омода кардани мутахассисони варзидаи соҳаи иқтисод барои ободию пешрафти кишвари соҳибистиқлоламон саҳми арзандаи худро гузоред.

Oct 05

Табрикоти Директори ДИС ДДТТ, номзади илмҳои иқтисод, дотсент Ҷалилзода А. А. ба муносибати Рӯзи забони давлатии Ҷумҳурии Тоҷикистон

Бо камоли эҳтиром ва самимияти афзун ба муносибати Рӯзи забони тоҷикӣ, ки ҳамасола санаи 5 октябр дар қаламрави кишвари соҳибистиқлоламон таҷлил карда мешавад, ҳамаи Шумо – ҳайати профессорону устодон ва донишҷӯёну кормандони донишкадаро табрику таҳният менамоям.
Тавре Асосгузори сулҳу ваҳдати миллӣ, Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон таъкид менамоянд: “Забони модарии мо – забони ширину шево ва шоиронаи тоҷикӣ, ки донишу маърифати дар тӯли ҳазорсолаҳо андӯхтаи мардумро дар худ нигоҳ доштааст, гӯётарин далели ҳастӣ ва мақоми ҳаётбахши он дар сарнавишти таърихии миллати мо ба ҳисоб меравад. Яъне, миллати шарафманди тоҷик таъриху фарҳанги камназири худро бо ҳамин забон иншо ва ба ҷаҳониён муаррифӣ кардааст”.

Забони тоҷикӣ дар раванди ташаккул ва таҳаввули худ роҳи ниҳоят душвору пурпечутобро тай карда, аз санҷишу имтиҳонҳои сахту сангини таърих гузаштааст ва имрӯз, яъне дар даврони соҳибистиқлолӣ ва бунёди давлати миллӣ низ рисолати худро ба сифати яке аз рукнҳои асосии давлатдорӣ ва омили ҷомеасозу ваҳдатофарин идома дода истодааст.
Қонун «Дар бораи забони давлатии Ҷумҳурии Тоҷикистон» вазъи ҳуқуқӣ ва доираи истифодаи забонро муайян карда, дурнамои рушди онро дар замони истиқлоли давлатӣ – дар шароити дигаргуниҳои бузурги сиёсиву иқтисодӣ ва иҷтимоиву фарҳангӣ ба танзим медарорад. Тавассути ин қонун забони тоҷикӣ ҳамчун забони сиёсату қонунгузорӣ ва коргузориву муошират эътироф гардид.

Пешвои муаззами миллат барҳақ фармудаанд: “Қарзи фарзандӣ ва рисолати инсонии мост, ки забони модариамон, яъне ин забони ширину шоиронаро баробари модари худ азиз шуморем, дӯст дорем, онро мисли модар, ки моро ба дунё оварда, меҳри забонро бо шири поку ҷонбахш ва муҳаббати онро бо аллаи гӯшнавозаш дар ҷисму ҷони мо ҷой кардааст, эҳтирому эҳтиёт кунем ва мисли гаронбаҳотарин сарвати умрамон ҳамеша гиромӣ дорем”.
Бо ифтихору садоқат ба забони модарӣ, бори дигар ҳамаи Шумоёнро ба муносибати Рӯзи забони тоҷикӣ самимона табрик гуфта, бароятон дар ҷодаи хизмат ба хотири ҳифз ва рушди забони давлатӣ барору комёбиҳо таманно менамоям.

Sep 25

Иштироки Директори ДИС ДДТТ дар ҷамъомад оиди лоиҳаҳои Коргоҳи Мози дар шаҳри Шеняни Ҷумҳурии мардумии Чин

Санаи 24 сентябри соли 2024 ҷамъомад оиди лоиҳаҳои Коргоҳи Мози, ки аз тарафи Вазорати маорифи музофоти Ляонин дар шаҳри Шеняни Ҷумҳурии мардумии Чин ташкил шуда буд, баргузор гардид.Дар чорабинии мазкур Маркази байналмилалии илмӣ-тадқиқотии Коргоҳи Мози дар ш. Хуҷандро Директори ДИС ДДТТ Ҷалилзода А.А. намояндагӣ кард. Зимни баромади худ Ҷалилзода А.А. доир ба густариши робитаҳо байни Ҷумҳурии Тоҷикистон ва Ҷумҳурии мардумии Чин, ки бо сиёсати одилонаи пешгирифтаи ҳарду сарварони кишвар амалӣ гашта истодааст, сухан намуд.

 Ҳамчунин Ҷалилзода А.А. аз сафари ҳайати ДИС ДДТТ ба Чин ва сафари ҳайати Донишгоҳи педагогии Шенян ба Тоҷикистон, аз қабили иштирок дар чорабиниҳо, семинарҳо, шиносоӣ бо илм ва саноат дар доираи Коргоҳи Мози ва натиҷаҳои бадастомада ёдовар шуд. Зимни суханронӣ ӯ ҳамчунин аз аҳамияти ҳамоҳангсозии илм бо истеҳсолот ҷиҳати омода намудани мутахассисони соҳибихтисос, ки ба ноил шудан ба Стратегияи 4-уми миллии Тоҷикистон, яъне саноатикунонии босуръати кишвар мусоидат мекунанд ва барои он метавонад нақши ҳалкунанда дошта бошад ва Коргоҳи Мози метавонад нақши калидиро дар ин самт дошта бошад, гуфтанӣ намуд.

Маркази байналмилалии илмӣ-тадқиқотии Коргоҳи Мози дар ш. Хуҷанд аз ҷониби ягона маърӯзачии байналмилалӣ, директори ДИС ДДТТ Ҷалилзода Абдурашит Абдукамол муаррифӣ гардид, ки ифтихори Донишкада мебошад. Ба натиҷаҳои бадастовардашуда ва нақшаҳои фаъолияти ояндаи Коргоҳи Мози, ки Ҷалилзода Абдурашит пешниҳод намуд, аз тарафи Вазорати маорифи музофоти Ляонин баҳои баланд дода шуд.

Хотиррасон мекунем, ки санаи 20 августи соли 2024 дар Донишкадаи иқтисод ва савдои Донишгоҳи давлатии Тоҷикистон дар ш. Хуҷанд маросими ифтитоҳи Маркази байналмилалии илмӣ-тадқиқотии Коргоҳи Мози дар ш. Хуҷанд баргузор гардид. Мавриди тазаккур аст, ки маркази мазкур дар доираи барномаи маблағгузории Вазорати маорифи музофоти Ляонини Ҷумҳурии Мардумии Чин созмон дода шуда, аз тарафи Донишгоҳи омӯзгории Шэнян дар якҷоягӣ бо Донишкадаи иқтисод ва савдои Донишгоҳи давлатии тиҷорати Тоҷикистон дар ш. Хуҷанд фаъолияти худро ба роҳ гузошт.