Санаи 21-уми феврали соли равон дар Донишкада чорабинии идона, бахшида ба 29-умин солгарди таъсисёбии Қувваҳои Мусаллаҳи Ҷумҳурии Тоҷикистон баргузор гардид. Нахуст директори Донишкада дотсент Ҳошимзода Ҳомид Ҳасан устодону донишҷӯёнро бо фарорасии Рӯзи Артиши миллӣ таҳният гуфта, барояшон комёбиву бурдбориҳо таманно намуд. Аз ҷумла зикр гардид, ки 23-юми феврали соли равон аз таъсисёбии Артиши миллӣ, ки он зодаи Истиқлолияти давлатӣ аст, 29 сол пур мешавад. Дар остонаи ин ҷашни бошукуҳи таърихӣ ҳар як фарди ватандӯст беихтиёр роҳи тайнамудаи Қувваҳои Мусаллаҳи кишварро албатта пеши назар меорад.
Таъкид намудан зарур аст, ки дар чорабинӣ афсарону прапоршикони шуъбаи таъиноти махсуси қисми ҳарбии 051056 Гвардияи миллии Ҷумҳурии Тоҷикистон иштирок ва баромад намуда, донишҷӯёнро ба хизмати ҳарбӣ даъват намуданд.
Дар қисмати фарҳангии чорабинӣ донишҷӯён бо суруду тарона, саҳнача ва шеъру бадеҳахонӣ хотири аҳли нишастро болида намуданд.
