Санаи 29 – марти соли равон дар Донишкадаи иқтисод ва савдои ДДТТ рӯзи Эрасмус+ барои донишҷӯён баргузор гардид. Дар ин чорабинӣ кормандони шуъбаи робитаҳои байналмилалӣ ва меҳмон аз хориҷи кишвар профессор Гилберт Дуглас иштирок карданд. Мудири шуъбаи муносибатҳои байналмилалӣ Саидқосим Мухторов чорабинии мазкурро оғоз карда, ба донишҷӯён дар бораи Барномаи мубодилавии Эрасмус+ шарҳи мухтасар дод.
Баъдан хатмкунандагони барномаи Эрасмус+ дар соли таҳсили 2021-2022 Солиев Шероз, Сатторов Суҳроб, Шарифов Муҳаммадфарид таҷрибаи худро, ки аз Донишгоҳи менеҷменти Варна (Булғория) гирифтаанд ба донишҷӯён муаррифӣ карданд. Пас аз он 5 иштирокчиёни барномаи Эрасмус+ ки айни ҳол таҳсили худро дар Донишгоҳҳи Кордоба ва Кантабрия (Испания) давом дода истодаанд навори ҷолибро дар бораи таҳсили худ намоиш доданд.
Онҳо дар суханронии худ қайд карданд, ки “Барномаи мубодилавии Эрасмус+ яке аз имкониятҳои беҳтарин барои гирифтани таҳсилот аз хориҷи кишвар барои донишҷӯён мебошад. Ба донишчӯён маслиҳат доданд, ки имконияти худро аз даст надода, дониши худро баланд созанд ва иштирокчии ин барнома гарданд”.
Дар рафти чорабинӣ Мухторов Саидқосим ҳамкориҳои нави Донишкадаро, ки бо Донишгоҳҳои хориҷи кишвар, ки дар оянда зиёда аз 15 лоиҳаҳои нав бояд ба имзо расад маълумот дод. Баъд суханро ба меҳмони Донишкада профессор Дуглас Гилберт супориданд. Профессор Дуглас Гилберт дар суханронии худ зикр кард, ки “Донишҷӯён бояд забонро ва касби худро ба дараҷаи олӣ донанд то дар оянда муваффақ шаванд”.
Дар анҷоми чорабинӣ донишҷӯён бо хатмкунандагони барномаи мубодилавии Эрасмус+, ки дар давлатҳои хориҷа таҳсил кардаанд саволҳо дода, ҷавоби мушаххас гирифтанд.
