70 соли пурсамар

Мавлуди накӯи умр бодо табрик,
Ин як зи ҳазори умр бодо табрик.
Дар авҷу барор бахту толеъи ту бод,
Ин авҷу барори умр бодо табрик!

Аҳли раёсат, омӯзгорон ва донишҷӯёни Донишкадаи иқтисод ва савдои ДДТТ устоди некӯсиришт, шахси ҳалиму ғамхор, педагоги варзида Ҷалил Абдуғаниевич Қурбоновро бо рӯзи мавлуд ва синни мубораки 70-солагиашон самимона табрику таҳният гуфта, ба устод саломатии бардавом, умри пурсамару нек, рӯзгори ободу осуда ва тамоми хушиҳои рӯзгорро таманно менамоем. Ба ҳамин муносибат, дар толори хурди донишкада бо иштироки директори муассиса н.и.и., дотсент Олимӣ Рауф Латифзода ва аҳли устодони кафедраи забонҳои хориҷӣ чорабинӣ баргузор гардид, ки соҳибҷашнро ҳамагон табрику таҳният гуфтанд.
Қурбонов Ҷалил Абдуғаниевич 4-уми  январи соли 1948 дар ҷамоати Унҷӣ, ноҳияи Хуҷанд (ҳоло ноҳияи Б. Ғафуров) таваллуд шудааст. Соли 1964 мактаби миёнаи № 14-и ноҳияро хатм карда, худи ҳамон сол ба Донишкадаи давлатии омӯзгории ба номи С.М. Киров (ҳоло ДДХ ба номи Б. Ғафуров) ба факултаи забонҳои хориҷӣ  (англисӣ) дохил шуда, онро соли 1968 бо ихтисоси омӯзгори забони англисӣ  тамом кард. 1-уми августи 1968  дар мактаби миёнаи №2  ба номи  Рӯдакӣ ба ҳайси  муаллими  забони англисӣ то соли  1969  фаъолият намуд.
Аз соли 1969 то соли 1970  дар хизмати ҳарбӣ дар сафи қӯшунҳои  саветӣ  дар ҷумҳурии Қазоқистон,  шаҳри  Қараганда  буд.  Аз 1-уми августи соли 1970  то соли 1995   дар мактаби миёнаи №14  ба ҳайси муаллими забони англисӣ фаъолияти омӯзгорӣ бурд.  Аз соли 1995  то соли 1999  дар Донишкадаи  политехникии ба номи  М. С.  Осимӣ, омӯзгори забони англисӣ  шуда кор кард. Аз соли  1999 то соли  2010  муаллими забони англисии  филиали хуҷандии Донишкадаи андоз ва андозбандӣ. Аз соли  2010  то ҳоло муаллими калони кафедраи забонҳои хориҷии Донишкадаи иқтисод ва савдои Донишгоҳи Давлатии тиҷорати Тоҷикистон  дар шаҳри Хуҷанд мебошад.
Бо таманнои рӯзгори хушу осудаи Шумо устоди гиромӣ, аз номи аҳли кормандони донишкада баҳратон гуфтанием:

Рухат хуршедсон пурнур бодо,
Ғаму ғусса зи ҷонат дур бодо.

Leave a Reply

Your email address will not be published. Required fields are marked *